گورنر پنجاب چودھری محمد سرور سے  کورین بدھ مت کے صدر وینریبل ونہینگ کی سربراہی میں 70 رکنی وفد کی ملاقات ہوئی۔

گورنر ہاؤس میں ہونیوالی ملاقات میں پاکستان میں مذہبی سیاحت، بدھ مت مذہب کے ثقافتی ورثے کی تزئین و آرائش، بحالی اور انکو دنیا بھر کے بدھ مت پیروکاروں کے لیے کھولنے کے حوالے سے گفتگو کی گئی۔

اس موقع پر گورنر پنجاب چودھری محمد سرور کا کہنا تھا کہ کوریا کے ساتھ ہمارے اچھے تعلقات ہیں۔ ہم پاکستان میں مذہبی سیاحت اور ثقافت کے فروغ کے لیے کوشاں ہیں۔

گورنر پنجاب چودھری محمد سرور کا مزید کہنا تھا کہ ہم مستقبل میں بدھ مت پر بین الاقوامی کانفرنس بھی بلائیں گے۔ ٹیکسلا میں بدھ مت کے قدیم مذہبی ورثے کو مزید محفوظ بنائیں گے۔

وفد کے صدر وینریبل ونہینگ نے گفتگو کرتے ہوئے کہا ہے کہ ہم گورنر ہاؤس بلانے پر گورنر پنجاب کا شکریہ ادا کرتے ہیں۔لاہور ایک تاریخی اور زندہ دل شہر ہے جبکہ ہم پاکستان اور کوریا کے تعلقات مزید بہتر دیکھنا چاہتے ہیں، واپس جا کر سب کو بتاوں گا کہ پاکستان ایک پر امن ملک ہے۔

دوسری جانب گورنر چوہدری محمد سرور سے امر یکی قونصل جنرل کیتھرین راڈریگیز کی بھی ملاقات ہوئی۔

ملاقات کے دوران مسئلہ کشمیر ‘پاک امر یکہ تعلقات اور خطے کی صورتحال پر بات چیت کی گئی۔

گورنر چوہدری محمد سرور نے امریکی قونصل جنرل سے ملاقت میں کہا کہ مسئلہ کشمیر پر امر یکی صدرٹرمپ کی ثالثی کی پیشکش کا پاکستان نے خیر مقدم کیا ہے جبکہ امر یکہ سمیت عالمی طاقتوں کو بھی مسئلہ کشمیر کے حل کیلئے اپنا کردار اداکر نا چاہیے۔

گورنر چوہدری محمد سرور نے مزید کہا کہ بھارت کے جنگی جنون اور کشمیر میں مظالم کی وجہ سے خطے میں امن دائو پر لگا ہے۔

اس موقع پر امر یکی قونصل جنرل کیتھرین راڈریگیز کا کہنا تھا کہ پاکستان اور امریکہ ایک دوسرے کے قر یب آرہے ہیں جبکہ وزیر اعظم عمران خان اور امر یکی صدر کے تعلقات بھی مثالی ہے۔