وزیر اعظم عمران خان کی زیر صدارت کرتارپور راہداری کے افتتاح کے حوالے سے اجلاس ہوا۔

اجلاس میں کرتار پور کواریڈور کے افتتاح، بھارت اور دنیا بھر سے آنے والے سکھ زائرین کی سہولت کاری کے لیے کیے جانے والے انتظامات کا جائزہ لیا گیا۔

وزیر اعظم نے سکھ زائرین کے لیے مہیا کی جانے والی سہولیات اور انتظامات پر اطمینان کا اظہار کیا۔

اس موقع پر وزیر برائے مذہبی امور پیر نور الحق قادری، وزیر داخلہ برگیڈئیر (ر) اعجازاحمد شاہ ، سیکرٹری خارجہ، سیکرٹری داخلہ،اسپیشل سیکرٹری خزانہ،سیکرٹری دفاع ، سیکرٹری مذہبی امور و دیگر سینئر افسران شریک ہوئے۔

دوسری جانب وزیر اعظم عمران خان نے سماجی رابطے کی ویب سائٹ ٹویٹر پر اپنے ایک بیان میں کہا کہ گرونانک جی کے 550ویں جنم دن کی تقریبات کے لئے ریکارڈ مدت میں کرتاپور تیار کرنے پر میں اپنی حکومت کو دلی مبارکباد پیش کرتا ہوں۔

عمران خان کا کہنا تھا کہ گرونانک جی کے 550ویں جنم دن کی تقریبات کے لئے ریکارڈ مدت میں کرتاپور تیار کرنے پر میں اپنی حکومت کو دلی مبارکباد پیش کرتا ہوں۔

واضح رہے کہ حکومت پاکستان بابا گرونانک کے 550ویں یوم پیدائش کے موقع پر نومبر میں کرتارپور راہداری کھولنے کے لیے پُرعزم ہے جس کا باضابطہ افتتاح 9 نومبر کو وزیراعظم عمران خان کریں گے۔

اس سے قبل حکومت پاکستان نے سکھوں کے مذہبی پیشوا بابا گرونانگ کا 550 واں جنم دن کے موقع پر 50 روپے مالیت کا یادگاری سکہ جاری کیا تھا۔

سکے کے ایک رُخ پر اسلامی جمہوریہ پاکستان اور قومی نشان ہے جبکہ دوسرے رُخ پر سکھوں کی عبادت گاہ کی تصویر کندہ ہے۔ 50 روپے مالیت کے یادگاری سکے پر گرونانک دیو جی 1469-2019 کے الفاظ کندہ ہیں۔