وزیراعظم عمران خان کےدورہ لاہور کے دوران پنجاب کابینہ کی 10 وزارتوں میں ردو بدل کا امکان ظاہر کیاجارہاہے۔

تفصیلات کے مطابق پنجاب کابینہ میں تین خواتین وزراء کی شمولیت کا بھی امکان اور ناقص کاکردگی کا مظاہرہ کرنیوالے وزرا سے قلمدان واپس لیے جاسکتے ہیں۔

ذرائع کے مطابق کابینہ میں علیم خان کو دوبارہ شامل کیاجائےگااور اہم  وزارت دینے کا امکان بھی ظاہرکیاگیاہے۔ اس کے علاوہ صوبائی وزیر فیاض الحسن چوہان کو بھی اہم ذمہ داری سونپی جائے گی۔

ذرائع نے بتایاکہ ڈاکٹر یاسمین راشد سےسیکنڈری ہیلتھ کی وزارت واپس لی جاسکتی ہے۔ انفارمیشن اینڈ کلچر کی وزراتوں کو بھی الگ الگ کیا جاسکتا ہے۔

اس کے علاوہ پنجاب کابینہ کی کھیل اور سیاسحت پر بھی دو الگ وزراء تعینات ہو سکتے ہیں۔ وزیر جیل خانہ جات سے بھی قلمدان واپس لیاجاسکتا ہے۔

ذرائع نے بتایاکہ پنجاب کابینہ میں اکھاڑ پچھاڑ کی حتمی منظوری وزیراعظم دیں گے اور وزارتی ٹیم میں ردوبدل کے ساتھ بیوروکریسی کو بھی مزید اختیارات دیئے جائیں گے۔

ذرائع نے بتایاکہ کہ نئے چیف سیکرٹری اور آئی جی پنجاب کو اپنی اپنی ٹیم بنانے کا مکمل اختیار دے دیا گیا ہے۔

دوسری جانب وزیر اعظم عمران خان سے وزیراعلیٰ پنجاب عثمان بزدار کی ملاقات ہوئی جس میں عثمان بزدار نے کابینہ ارکان کی کارکردگی پر وزیراعظم کو بریفنگ دی ہے۔

وزیراعظم عمران خان سے وزیر اعلیٰ پنجاب عثمان بزدار کی ملاقات ہوئی، ملاقات میں پنجاب کے امور اور مجموعی ملکی صورتحال زیر غور آئی۔ یہ ملاقات وزیراعظم عمران خان کے ایک روزہ دورہ لاہور کے موقع پر ہوئی ہے۔

وزیر اعظم عمران خان کی وزیر اعلیٰ پنجاب سے رواں ہفتے یہ تیسری ملاقات ہے۔اس سے قبل وزیر اعظم نے اسلام آباد میں عثمان بزدار سے 2 دن میں 2 ملاقاتیں کی تھیں جن میں انہوں نے پنجاب کے انتظامی ڈھانچے پر عدم اطمینان کا اظہار کیا تھا۔

وزیر اعظم نے کور کمیٹی اجلاس میں پنجاب میں گورننس کی خامیوں پر برہمی کا اظہار کیا تھا، اراکین کور کمیٹی نے اس موقع پر تجویز دی کہ بہتر گورنس کے لیے بیورو کریسی کو متحرک ہونے پڑے گا۔

بعد ازاں وزیر اعظم نے وزیر اعلیٰ پنجاب سے علیحدہ ملاقات کی جس میں صوبے میں انتظامی تبدیلیوں کا معاملہ زیر غور آیا۔وزیراعظم نے عثمان بزدار کو پنجاب میں انتظامی اصلاحات سے متعلق اہم فیصلوں کی ہدایت بھی کی تھی۔