پرامن سیاست کادرس دینےوالی جماعتیں اسلحے کے زور پر کتنی مضبوط  ہیں ،حیران کن انکشافات سامنے آگئے۔

تفصیلات کے مطابق سب سےزیادہ عوامی  مسائل پر آواز اٹھانے کا دعوی کرنے والی  جماعت  پاکستان پیپلز  پارٹی  اسلحے کا زور  رکھنے  میں   سب سے آگے ہے۔

پارلیمنٹ کے 100 اراکین نے اپنے اثاثوں میں ہتھیار ظاہر کیے تھے جن میں 50 کا تعلق پیپلزپارٹی سے ہے اس طرح پاکستان پیپلزپارٹی (پی پی پی ) پارلیمان میں سب سے زیادہ ہتھیار رکھنے والی سیاسی جماعت ہے۔

پاکستان پیپلزپارٹی کے علاوہ اثاثوں میں ہتھیار ظاہر کرنے والے 20 قانون سازوں کا تعلق پاکستان تحریک انصاف (پی ٹی آئی)، 5 کا تعلق پاکستان مسلم لیگ(ن)، 5 کا گرینڈ ڈیموکریٹک الائنس (جی ڈی اے) اور 4 کا بلوچستان عوامی پارٹی سے ہے۔

وہ افراد جنہوں نے اپنے اثاثوں میں ہتھیار ظاہر کیے ان میں قومی اسمبلی کے 19 اراکین جن میں سے 6 کا تعلق پی ٹی آئی، 6 کا پاکستان پیپلزپارٹی سے ہے، 2 اراکین کا تعلق پاکستان مسلم لیگ(ن)، 2 کا متحدہ قومی موومنٹ ( ایم کیو ایم )، ایک کا جی ڈی اے، ایک کا متحدہ مجلس عمل سے ہے جبکہ اس میں ایک آزاد امیدوار بھی شامل ہے۔

سینیٹ میں مجموعی طور پر 10 اراکین نے اپنے ہتھیار ظاہر کیے ہیں، جن میں سے 2 کا تعلق پاکستان پیپلزپارٹی، 2 کا پاکستان تحریک انصاف، 2 کا پشتونخوا ملی عوامی پارٹی، 2 کا نیشنل پارٹی، ایک کا پاکستان مسلم لیگ(ن) اور ایک رکن آزاد ہے۔

سندھ اسمبلی میں 47 اراکین نے اثاثوں میں ہتھیار ظاہر کیے ہیں جن میں سے 40 کا تعلق پاکستان پیپلزپارٹی، 4 کا گرینڈ ڈیموکریٹک الائنس، 2 کا پاکستان تحریک انصاف اور ایک کا تعلق پاکستان مسلم لیگ فنکشنل ہے۔

پنجاب اسمبلی میں اثاثوں میں ہتھیار ظاہر کرنے والے 10 اراکین میں سے 7 کا تعلق پی ٹی آئی سے ہے، 2 کا تعلق پاکستان مسلم لیگ(ن) اور ایک کا تعلق پاکستان پیپلزپارٹی سے ہ

بلوچستان اسمبلی میں 8 ارکان نے اثاثوں میں ہتھیار ظاہر کیے ہیں، جن میں سے 4 کا تعلق بلوچستان عوامی پارٹی (بی اے پی) سے ہے، ایک کا تعلق بلوچستان نیشنل پارٹی (بی این پی)، ایک کا بی این پی-اے ، ایک کا ہزارہ ڈیموکریٹک پارٹی سے ہے۔

کے پی اسمبلی کے جن اراکین نے اثاثوں میں ہتھیار ظاہر کیے ہیں ان میں سے 3 کا تعلق پاکستان تحریک انصاف، ایک کا تعلق پاکستان پیپلزپارٹی، ایک کا عوامی نیشنل پارٹی سے ہے جبکہ ان میں ایک آزاد رکن بھی شامل ہے۔

اپنے اثاثوں میں ہتھیار ظاہر کرنے والے ارکان اسمبلی میں سابق صدر آصف علی شامل ہیں جن کے پاس سب سے زیادہ ہتھیار موجود ہیں انہوں نے ایک کروڑ 66 لاکھ روپے مالیت کے ہتھیار ظاہر کیے لیکن ان کی نوعیت نہیں بتائی۔

اراکین پارلیمنٹ کی جانب  سے ظاہر کئے گئے     ہتھیاروں میں جرمن جی-3 ،بیٹل رائفل اور ایم پی-5 ،سب مشین گنز سے لے کر روسی ساختہ اے کے-47 یا معروف کلاشنکوف  شامل ہیں۔