وزیراعظم عمران خان سے وزیراعلیٰ پنجاب عثمان بزدار کی ملاقات ہوئی۔

ملاقات میں پنجاب کی سیاسی اور انتظامی صورتحال پر بات چیت کی جبکہ پنجاب میں نئی انتظامی تبدیلیوں پر وزیراعظم کو بریفنگ دی گئی۔

اس موقع پر وزیراعظم نےعوام کو ذیادہ سے زیادہ ریلیف فراہم کرنے کی ہدایت کرتے ہوئے کہا کہ عوام کو ریلیف فراہم کرنا حکومت کی اولین ترجیح ہے۔

دوسری جانب وزیراعظم عمران خان سے قانونی ٹیم کی ملاقات ہوئی جس میں وزیراعظم کو سپریم کورٹ کے فیصلے سے آگاہ کیا گیا۔

اس موقع پر قانونی ٹیم نے وزیراعظم کو فیصلے کے قانونی نکات پر بریفنگ دی۔

وزیراعظم کا کہنا تھا کہ عدالتوں کا احترام کرتے ہیں، ملک میں عدم استحکام کے خواہشمندوں کو آج بہت مایوسی ہوئی ہوگی کیونکہ عدم استحکام چاہنے والوں کی خواہشات کے برعکس اداروں کا ٹکرائونہیں ہوا۔

وزیراعظم عمران خان کا مزید کہنا تھا کہ وہ مافیاز جنہوں نے لوٹ مار کی رقم بیرون ملک ذخیرہ کررکھی ہے، اس فیصلے کے بعد ہمارے بیرونی دشمنوں اور اندرونی مافیا کو بھی بہت مایوسی ہوئی ہوگی۔

واضح رہے اس سے قبل بھی وزیرِ اعظم عمران خان کی زیر صدارت گنے کی قیمت کی سرکاری قیمت مقرر کرنے کے حوالے سے اعلیٰ سطحی اجلاس ہوا تھا۔

وزیرِ اعظم عمران خان نے اجلاس سے خطاب کرتے ہوئے کہا تھا کہ ملک میں زرعی شعبے کا فروغ خصوصاً چھوٹے کسانوں کو ریلیف فراہم کرنا حکومت کی اولین ترجیح ہے اس کے ساتھ ساتھ حکومت اس بات پر بھی خصوصی توجہ دے رہی ہے کہ زرعی اور صنعتی شعبے کی ترقی کو مساوی طور پر یقینی بنایا جائے اور عام آدمی کو ریلیف فراہم کیا جائے۔

گنے کی سرکاری قیمت مقرر کرنے کے حوالے سے وزیرِ اعظم نے کہا تھا کہ گنے کی قیمت مقرر کرتے ہوئے اس بات کو یقینی بنایا جائے کہ  گنے کی مقرر کردہ سرکاری قیمت سے جہاں کسانوں کی حوصلہ افزائی ہو وہاں وہ تمام اقدامات کیے جائیں کہ چینی کی قیمت میں استحکام کو بھی یقینی بنایا جاسکے۔