پیپلز پارٹی نے آصف علی زرداری کے علاج کیلئے پرائیویٹ میڈیکل بورڈ بٹھانے کا مطالبہ کر دیا ہے۔

تفصیلات کے مطا بق پیپلز پارٹی نے سا بق صدر آصف زرداری کی صحت کو لاحق خطرات کی وجہ سے جیل حکام کو پرائیویٹ بورڈ کیلئے درخواست دی ہے۔

ذرائع کے مطا بق جیل حکام کو لکھے گئے خط کے متن میں کہا گیا کہ نجی میڈیکل بورڈ کا مطالبہ سرکاری ڈاکٹروں کی سفارشات کی روشنی میں کیا گیا ہے۔

سرکاری بورڈ نے سا بق صدر آصف زرداری کی صحت کے حوالے سے خطرے کا اظہار بھی کیا، بورڈ نے کہا کہ شریانوں میں خون کا جمنا آصف زرداری کی زندگی کے لیے خطرناک ہے، شوگر لیول بھی خطرناک حد تک اوپر نیچے ہو رہا ہے۔

ذرائع کے مطا بق خط میں مزید کہا گیا کہ آرتھو بیڈنگ نہ ملنے سے کمر کے دیرینہ مرض نے شدت اختیار کرلی ہے، سرکاری بورڈ نےعلاج کے لیے نیورولوجسٹ کی مدد لینے کی بھی سفارش کی ہے۔

واضح رہے کہ پیپلز پارٹی کے چئیر مین بلاول بھٹو کے ترجمان مصطفیٰ نواز کھوکھر نے کہا ہے کہ قانون ہر شخص اور قیدی کے علاج معالجے کی ضمانت دیتا ہے، آصف زرداری کے علاج کا مطالبہ رعایت نہیں بلکہ قانونی حق ہے۔

ترجمان سندھ حکومت مرتضیٰ وہاب کا اس با رے میں کہنا ہے کہ وفاق کو ہوش کے ناخن لینے چاہئیں، آصف زرداری کو ذاتی معالج سے ملنے کی اجازت دی جائے۔