وزیراعظم عمران خان کی زیر صدارت حکومتی معاشی ٹیم کا اجلاس ہوا ، جس میں اجلاس میں ملکی معاشی صورتحال، اعلیٰ عدالتوں میں ایف بی آر سے متعلقہ زیر التوا کیسز کے حوالے سے پیش رفت کا جائزہ لیا گیا۔

اجلاس میں ترقیاتی منصوبوں میں پیش رفت کا باقاعدگی سے جائزہ لینے کے لئے کیے جانے والے اقدامات پر بات چیت کی گئی جبکہ ایکسپورٹرز کے ٹیکس ریفنڈز کی ادائیگیوں، ترکمانستان افغانستان پاکستان انڈیا (ٹاپی) گیس پائپ لائن منصوبے میں پیش رفت، نان ٹیکس ریونیو بڑھانے کے سلسلے میں اقدامات پر بھی بریفنگ دی گئی۔

بریفنگ دیتے ہوئے کہا گیا کہ جولائی سے نومبر کے مہینوں کے لئے سامنے آنے والے اعدادوشمارکے مطابق برآمدات کے حجم اور ڈالر کے اعتبار سے آمدن میں اضافہ دیکھنے میں آیا ہے۔

وزیر اعظم کوبریفنگ دیتے ہوئے مزید کہا گیا کہ برآمدات میں پچھلے سال کے مقابلے میں  اس سال اکتوبر کے ماہ میں چھ فیصد اضافہ جبکہ نومبر کے مہینے میں 9.6فیصد اضافہ سامنے آیا ہے۔

 اٹارنی جنرل نے بھی وزیراعظم کو سپریم کورٹ، اسلام آباد ہائی کورٹ، لاہور لائی کورٹ، سندھ ہائی کورٹ اور پشاور ہائی کورٹ میں ایف بی آر سے متعلقہ زیر التوا کیسز پر بریفنگ دی۔

اٹارنی جنرل نے کہا کہ اعلیٰ عدلیہ میں ایف بی آر سے متعلق1089کیسز میں سے 551کا فیصلہ ہو چکاہے جبکہ  285مقدمات زیر التوا ہیں، دیگر مقدمات میں یا تو فیصلہ محفوظ ہے یا زیر سماعت ہیں۔

وزیراعظم عمران خان نے اٹارنی جنرل کو ہدایت دی کہ زیر التوا کیسز کے جلد از جلد حل کے لئے کوششیں تیز کی جائیں۔

وزیراعظم نے کہا کہ ایف بی آر سے  متعلقہ مقدمات میں حکومت کا نقطہ نظر موثر انداز میں عدالت کے سامنے رکھنے کے لئے اٹارنی جنرل آفس کو درکار تمام وسائل فراہم کیے جائیں گے جبکہ مقدمات کے جلد حل سے کاروباری برادری کے مسائل حل ہوں گے اور کاروباری معاملات میں آسانی پیدا ہوگی۔

اجلاس میں چیئرمین ایف بی آر کی جانب سے ایکسپورٹرز کے ریفنڈز کی ادائیگیوں کے حوالے سے کیے جانے والے اقدامات پر وزیرِ اعظم کو تفصیلی بریفنگ دی جس پر وزیراعظم نے ایف بی آر کو ہدایت دی کہ ریفنڈز کی ادائیگیوں کے سلسلے میں متعارف کرائے جانے والے نظام کو مزید آسان بنایا جائے۔

عمران خان کا کہنا تھا کہ ایکسپورٹرز خصوصاً چھوٹے اور درمیانے درجے کے ایکسپورٹرز کو بقایا جات کی وصولی میں کسی قسم کی دقت پیش نہ آئے انھیں ہر ممکنہ سہولت فراہم کی جائے۔

وزیراعظم کا یہ بھی کہنا تھا کہ مشکل معاشی حالات کے باوجود حکومتی اقدامات کے نتیجے میں معاشی استحکام آیا ہے جبکہ کاروباری طبقے کے اعتماد میں اضافہ ہوا ہے۔

عمران خان نے کہا کہ  معاشی استحکام کے نتیجے میں کارباری برادری کے اعتماد اور مثبت جذبات کو مزید تقویت دینے کی ضرورت ہےجبکہ تاجروں کے لیے آسانیاں پیدا کی جائیں تاکہ ان کی حوصلہ افزائی ہو اور ان کو مالی وسائل کی قلت پیش نہ آئے۔

اس موقع پر معاون خصوصی برائے پٹرولیم ندیم بابر نے ٹاپی گیس پائپ لائن کی پیش رفت سے شرکاء کو آگاہ کیا جبکہ سیکرٹری خزانہ نے نان ٹیکس ریونیو میں اضافے کے حوالے سے اجلاس کو بریفنگ دی جس پر وزیرِ اعظم نے نان ٹیکس ریونیو بڑھانے کے سلسلے میں کوششوں کو سراہا۔

سیکرٹری منصوبہ بندی نے کہا کہ تمام اداروں کو ہدایت کی گئی ہے کہ وہ تمام ترقیاتی منصوبوں پر بروقت عمل درآمد اور ان کی بلا تعطل روانی کو یقینی بنائیں جبکہ ترقیاتی منصوبوں کا وسط سالہ جائزہ جنوری 2020جبکہ سالانہ جائزہ اگست میں لیا جائے گا۔

اجلاس میں سابق وزیرِ خزانہ شوکت ترین نے اجلاس کو لاہور میں “فوڈبنک “کے اجراء کے حوالے سے پیش رفت سے آگاہ کیا جس پر وزیرِ اعظم نے مستحق افراد کو انکی دہلیز پر کھانے کی فراہمی کے اقدام کو سراہا۔

وزیراعظم نے اجلاس میں کہا کہ حکومت اس منصوبے کی کامیابی کے لئے ہر ممکنہ سہولت فراہم کرے گی جبکہ معاشی استحکام اور نوجوانوں اور ہنر مندوں کے نوکریوں کے مواقع پیدا کرنا حکومت کی اولین ترجیح ہے۔

وزیراعظم عمران خان نے مزید کہا کہ حکومت کی تمام تر توجہ عام آدمی کو ریلیف فراہم کرنے پر مرکوز ہے جبکہ ترقیاتی منصوبوں پر بلاتعطل پیش رفت کو یقینی بنانے سے معاشی عمل میں تیزی آئے گی اور نوجوانوں کے لئے نوکریوں کے مواقع پیدا ہوں گے۔

اجلا س میں وزیر برائے اقتصادی امور حماد اظہر، وزیرِ برائے نیشنل فوڈ سیکیورٹی مخدوم خسرو بختیار، وزیر برائے منصوبہ بندی اسد عمر، وزیرِ توانائی عمرایوب، مشیر خزانہ ڈاکٹر عبدالحفیظ شیخ، وزیرِ اعظم کے مشیر ڈاکٹر عشرت حسین، اٹارنی جنرل انور منصور خان، معاون خصوصی ڈاکٹر فردوس عاشق اعوان، معاون خصوصی برائے سماجی تحفظ ڈاکٹر ثانیہ نشتر، معاون خصوصی ندیم بابر، چیئرمین سرمایہ کاری بورڈ ڈاکٹر زبیر گیلانی، گورنر اسٹیٹ بنک رضا باقر، سابق وزیرِ خزانہ شوکت ترین و دیگر سینئر افسران شریک ہوئے۔