چیف جسٹس آصف سعید کھوسہ نے کہا ہے کہ پچھلے دو ہزار سال سے دہشتگردی کا مسئلہ چل رہا ہے جبکہ  دہشت گردی صرف پاکستان کا نہیں پوری دنیا کا مسئلہ ہے اور تحقیق کی بنیاد پر دہشت گردی سمیت دوسرے مسائل کے حل میں بھی مدد مل سکتی ہے۔

 تفصیلات کے مطابق چیف جسٹس آصف سعید کھوسہ نے فیڈرل جیوڈیشیل اکیڈمی میں منعقدہ تقریب سے خطاب کرتے ہوئے کہا کہ سپریم کورٹ دہشت گردی کی تعریف سے متعلق فیصلہ دے چکی ہے، دہشت گردی کی تاریخ ہزاروں سال پرانی ہے اور پوری دنیا دہشتگردی کے مسائل سے لڑ رہی ہے۔

سعید کھوسہ نے کہا کہ ججز، وکلا اور عملے کی تربیت پر توجہ دے رہے ہیں، کسی بھی معاشرے کے اقدار جانے بغیر اصلاحات کا عمل بے اثر رہتا ہے۔

چیف  جسٹس آف پاکستان  نے  یہ بھی کہا کہ قبائلی اضلاع میں بہترین وکلا کو پریکٹس کے لیے جانا چاہیے، قبائلی اضلاع میں بہترین ججز اور پولیس کو بھیجا رہا ہے۔

توسیع کا قانون نہ ہونا آئین کی خلاف ورزی ہے، چیف جسٹس

اپنے بیان میں چیف جسٹس آصف سعید کھوسہ کا کہنا تھا کہ سیاسی ومذہبی مقاصد کے لیے دنیا بھرمیں تشدد کے طریقے اپنائے جاتے ہیں جبکہ روس کے خلاف جنگ کرنے والوں کو مغرب نے مجاہدین قرار دیا۔

چیف جسٹس آف پاکستان  آصف سعید کھوسہ کا مزید کہنا تھا کہ  ریسرچ پروگرامز کی حوصلہ افزائی کی ضرورت ہے، نئی چیزوں کے مشاہدے سے آپ بہت سی چیزیں سیکھ سکتے ہیں جبکہ  تحقیقات کے بل بوتے پر قومیں ترقی کرتی ہیں اور  تحقیقاتی بنیاد پر جج مقدمے کے تمام پہلوؤں کا جائزہ لے سکتا ہے۔

واضح رہے اس سے قبل بھی اسلام آباد میں چیف جسٹس آصف سعید کھوسہ نے ایک تقریب سے خطاب کرتے ہوئے کہا تھا کہ لاہورواقعہ ہائیکورٹ میں زیرسماعت ہےاسلیےاس پر زیادہ بات نہیں کرناچاہتا۔

 چیف جسٹس آصف سعید کھوسہ نے کہا تھا  کہ ڈاکٹری اوروکالت دونوں معاشرےکےباوقارپیشےہیں، دونوں پیشوں کےساتھ گران قدرروایات منسلک ہیں، لاہورمیں جوواقعہ پیش آیا وہ افسوسناک اور قابل مذمت ہے۔