شاہ محمود قریشی نے کہا ہے کہ نیب آرڈیننس لانے کا مقصد این آر او دینا نہیں۔

تفصیلات کے مطابق وزیرخارجہ شاہ محمود قریشی نےملتان میں پریس کانفرنس سے خطاب کرتے ہوئے کہا ہے کہ نیب آرڈیننس لانے کا مقصد کرپشن پر پردہ ڈالنا یا این آر او دینا نہیں، نیت پر شک نہ کیا جائے، نیب قوانین پر نظرثانی ن لیگ کا دیرینہ مطالبہ تھا۔

ذرائع کے مطابق شاہ محمود قریشی نے کہا کہ بھارت مسلسل انسانی حقوق کی پامالی کر رہا ہے، بھارت میں کرفیو کا کوئی جواز نہیں، فی الفور ختم ہونا چاہئے۔

وزیرخارجہ شاہ محمود قریشی کا کہنا ہے کہ بغیر مطالعہ تنقید ہمارے ہاں روش بن گئی ہے، اپوزیشن کہہ رہی ہے معیشت کا پہیہ نہیں چل رہا، دوسری طرف اپوزیشن معاشی معاملات میں رکاوٹ ڈالتی ہے، معاشی استحکام کیلئے حکومتی اقدامات پر تنقید کی جاتی ہے، کسی کو رعایت یا این آراو دینا ہمارا مقصد نہیں۔

وزیرخارجہ نے کہا کہ نیب قانون پر نظرثانی پیپلزپارٹی اور (ن) لیگ کا مطالبہ تھا، کراچی شہر ملک کی انڈسٹریل حب ہے، وہاں گیس بحران سے پروڈکشن میں کمی ہو گی، وفاقی حکومت نہیں چاہے گی کہ پرڈوکشن بند ہو، وفاقی حکومت سندھ کیساتھ پورا پورا تعاون کرے گی۔

وزیرِخارجہ شاہ محمود قریشی کا کہنا ہے کہ بنگلا دیش کی کرکٹ ٹیم پاکستان آنے کو تیار تھی لگتا ہے بھارت کے دباؤ میں اس نے نہ آنے کا فیصلہ کیا ہے۔

انہوں نے کہا کہ متنازع شہریت کے قانون کے خلاف بھارت بھر میں احتجاج ہو رہا ہے، دنیا بھر میں مودی سرکار کی ہندوتوا سوچ بے نقاب ہوگئی، اس وقت بھارت مکمل طور پر تقسیم نظر آ رہا ہے، بھارتی عوام سڑکوں پر ہیں۔

ایک سوال پر وزیرٍ خارجہ نے کہا کہ حکومتِ پاکستان کی کوشش رہی ہے کہ مسلم ملکوں کےدرمیان موجود غلط فہمیاں دور کرے۔