لاہورہائیکورٹ کی جانب سے پولیس کو پنجاب انسٹیٹیوٹ آف کارڈیالوجی (پی آئی سی) میں ہنگامہ آرائی میں بے قصور وکلا کے خلاف کارروائی کرنےسے روک دیا ہے۔

تفصیلات کے مطابق لاہورہائیکورٹ کے دو رکنی بنچ نے جسٹس سید مظاہر علی اکبر نقوی کی سربراہی میں پی آئی سی حملہ کیس میں گرفتار وکلا کی رہائی کے لیے درخواستوں پر سماعت کی۔

اس موقع پر سی سی پی او لاہور، ہوم سیکرٹری پنجاب،آئی جی پنجاب، ایڈووکیٹ جنرل پنجاب جمال احمد سکھیرا عدالت میں پیش ہوئے۔

درخواست گزار احسن بھون ایڈووکیٹ نےموقف اختیار کرتےہوئےکہا کہ پی آئی سی معاملےمیں گرفتار وکلاء کو تشدد کا نشانہ بنایا گیا اور چہروں پر نقاب چڑھا کر پیش کیا گیا۔ جس پرجسٹس مظاہرعلی اکبر نقوی نے آئی جی پنجاب سےاستفسارکیا کہ وکلاکو نقاب چڑھا کر کیوں پیش کیا گیا؟کیا کوئی شناخت پریڈ کروانی ہے؟

جسٹس مظاہرعلی اکبر نقوی نے ریمارکس دیے کہ اگر ایسا کریں گے تو پاکستان میں ڈیڑھ لاکھ کے قریب وکلاء ہیں تو آپ ملک میں افراتفری پھیلانا چاہتے ہیں، یہ عدالت میں ہمارے سامنے کھڑے وکلاء وہاں جاکر معافی مانگ کرآئے مگر ان کے ساتھ بھی کوئی اچھا سلوک نہیں کیا گیا، بار سے پی آئی سی کا ساڑھے 6 میل کا فاصلہ ہے اس وقت وکلاء کو کیوں نہیں روکا؟

آئی جی پنجاب نےعدالت کوبتایا کہ ہم نے چائنہ چوک میں وکلا کوروکا تھا مگروہاں انہوں نے وہاں کوئی غیر قانونی کام نہیں کیا تھا۔

جسٹس مظاہر علی اکبر نقوی نےریمارکس دیے آپ نے پی آئی سی میں جو کام کیا وہی کام راستے میں کرلیتے، وہ اسپتال جہاں پر اونچا سانس نہیں لے سکتے آپ نے وہاں وکلاء کو احتجاج کی اجازت دے دی؟

جسٹس مظاہر علی اکبر نقوی نے آئی جی پنجاب کو ہدایت کی کہ جو لوگ پی آئی سی حملے میں ملوث ہیں انکے ساتھ ہم نہیں ہیں، جو اس میں ملوث ہیں انکے خلاف قانون کے مطابق کارروائی کریں، کالا کوٹ کوئی گالی نہیں ہے۔

انہوں نے مزید ریمارکس دیتے ہوئے کہاکہ اس شخص کے بارے میں بات کریں جس نے اس کی توہین کی ہے، جو وکلاء اس واقعے میں ملوث نہیں انکو بے جا تنگ نہ کیاجائے، یہ بڑا واضح پیغام ہے آپ کو، ہم بھی پی آئی سی کے سربراہ اور ڈاکٹرز سے بات کر لیتے ہیں، وکلاء کے نمائندے بھی چیمبر میں آجائیں۔

بعد ازاں لاہور ہائیکورٹ نےہوم سیکرٹری اور آئی جی پنجاب کو بھی طلب کرتے ہوئے پی آئی سی ہنگامہ آرائی میں بے قصور وکلا کے خلاف کارروائی نہ کرنے کا حکم دے دیا۔