نیشنل ڈیٹا بیس اینڈ رجسٹریشن اتھارٹی (نادرا) نے ملک بھر میں معذور اور شدید بیمار افراد کے لیے گھر بیٹھے شناختی کارڈ بنوانے کی نئی سہولت متعارف کروادی ہے۔

تفصیلات کے مطابق وہ سروس جو ماضی میں بااثر شخصیات اور ان کے رشتہ داروں کو خوش کرنے کے لیے استعمال کی جاتی تھی ،اب وہ نئی سہولت عام آدمی کے لیے دستیاب ہوگی۔

ذرائع کے مطابق سروس کے تحت بائیومیٹرک تصدیق مشینوں سے لیس نادرا کے ملازمین نا صرف ایسے درخواست گزاروں کی رجسٹریشن کے لیے ان کے پاس جائیں گے بلکہ ان کے کمپیوٹرائزڈ قومی شناختی کارڈز بھی گھر پر پہنچائیں گے۔

نادرا کے سینئر عہدیدار نے بتایا کہ مذکورہ منصوبے کا مقصد عوام کو زیادہ سے زیادہ سہولیات فراہم کرنا ہے جوکہ وزیراعظم عمران خان کے وژن کا حصہ بھی ہے۔

انہوں نے کہا کہ سروس کا مقصد بیمار افراد، معذور، خصوصی افراد اور بزرگوں کو ان کے گھروں پر رجسٹریشن کی سروس فراہم کرنا ہے۔

اس کے ساتھ ساتھ گھر بیٹھے رجسٹریشن کے لیے ‘مین پیک موبائل یونٹس’ سہولت فراہم کرے گا۔

مذکورہ سہولت سے مستفید ہونے کے لیے اس کے اہل افراد کو نادرا کے ریجنل یا زونل دفاتر یا مراکز میں درخواست دینی ہوگی، جس کے بعد موجودہ رجسٹریشن پالیسی کے تحت درخواست پر پیش رفت ہوگی۔

ترجمان نادرا کے مطابق ایسے درخواست گزاروں کی رجسٹریشن کا عمل مکمل کرنے کے لیے مین پیک یونٹ ان کے گھر بھیجا جائے گا۔

اب شناختی کارڈ بنوانا نہایت ہی آسان

ترجمان نادرا نے کہا کہ ان کے قومی شناختی کارڈ بھی مقررہ مدت میں ان کے گھروں پر پہنچائے جائیں گے۔

انھوں نے مزید کہا کہ معذور، شدید بیمار اور بزرگ افراد اپنی بنیادی شناختی دستاویز سے صرف اس لیے محروم ہیں کیونکہ ان کے لیے نادرا مراکز آنا مشکل ہے۔

ترجمان نے کہا کہ چیئرمین نادرا نے متعلقہ عہدیداران کو خصوصی افراد کے لیے خصوصی انتظامات کرنے کی ہدایات جاری کی تھیں۔