معاون خصوصی برائے اطلاعات فردوس عاشق اعوان نے کہا کہ عمران خان نا ممکن کو ممکن بنا کر پاکستان کے ایوانوں میں آئے ہیں  اور میں ڈنکے کی چوٹ پر کہتی ہوں عمران خان ایک سیاستدان نہیں، ایک سوشل ورکر ہیں۔

تفصیلات کے مطابق وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے میڈیکس انٹرنیشنل کانفرنس سے خطاب کرتے ہوئے کہا کہ ہماری حکومت اس ملک کو ایک اسلامی فلاحی ریاست بنانے کی جانب گامزن ہےاور عمران خان ملک میں صحت کے شعبہ میں اصلاحات لارہا ہے۔

فردوس عاشق اعوان ے کہا کہ میری تربیت میں میرے والدین کا اہم کردار ہے، میں سیاست میں روزگار اور کاروبار کے لیے نہیں آئی جبکہ  پروفیشنل ازم کے ساتھ اچھا انسان ہونا ضروری ہے، میرا تعارف سماجی کارکن کا ہے جس پر فخر ہے۔

معاون خصوصی برائے اطلاعات ونشریات نے  یہ بھی کہا کہ شوکت خانم غریب اور مستحق لوگوں کے لیے امید کی کرن ہے، آج کا مریض جاگیردار، سرمایہ دار نہیں ہے ۔

عمران خان پاکستان کو ’قائد کا پاکستان‘ بنانے کے لیے کوشاں ہیں، ڈاکٹرفردوس

فردوس عاشق اعوان کا کہنا تھا  کہ امیر کے لیے تو اتنی مشکلات نہیں کیوں کہ وہ پیسے والا ہوتا ہے، عمران خان نےغریبوں کے لیے کینسر کا اسپتال بنایا۔

معاون خصوصی برائے اطلاعات ونشریات کا یہ بھی کہنا تھا کہ پاکستان کا تعارف اسلامی فلاحی ریاست کا ہے، ریاست کی ذمہ داری ہے کہ وہ شہریوں کو علاج کی سہولتیں دے، اسپتالوں میں 90 فیصد لوگ مریضوں کو سہولتیں دے رہے ہیں، اسپتالوں میں 10 فیصد ایسے بھی ہیں جو مریضوں کا استحصال کرتے ہیں۔

فردوس عاشق اعوان نے کہا کہ میڈیکل کی تعلیم حاصل کرنے والے کو اپنے مقصد کو نہیں بھولنا چاہیے، طبی شعبے سے وابستہ ہر شخص کا فرض دکھی انسانیت کی خدمت ہے، بدقسمتی سے پبلک اسپتالوں میں مریض، ڈاکٹرز کا رشتہ کمزور ہوتا نظر آتا ہے۔

اپنے بیان میں معاون خصوصی برائے اطلاعات ونشریات  نے یہ بھی کہا   کہ آج سب سے زیادہ ہیلتھ چیلنجز پاکستان میں بڑھ رہے ہیں، پالیسی میکر اور عمل درآمد کے اداروں کو مل بیٹھ کر کام کرنا ہوگا۔

فردوس عاشق اعوان کا کہنا تھا کہ  حکومت پبلک پرائیویٹ پارٹنر شپ کے تحت کام کرنے کیلئے تیار ہے جبکہ اووسیز پاکستانی ڈاکٹرز واپس آئیں انہیں بہترین ماحول فراہم کریں گے۔

معاون خصوصی برائے اطلاعات فردوس عاشق اعوان  کا مزید کہنا تھا کہ ملک کو معیاری ادویات کی فراہمی کو یقینی بنانے کیلئے ڈریپ کی بھی تنظیم نو کی جارہی تاکہ ملک سے جعلی و غیر معیاری ادویات کا خاتمہ ہوسکے۔