وزیراعظم عمران خان نے کہا ہے کہ بھارت کے لوگ اب نریندر مودی کے خلاف احتجاج کر رہے ہیں اور  اب ہندو، مسلم، سکھ اور مسیحی سب مودی کے خلاف کھڑے ہوں گے،مودی کے ظلم کو بھارتی خود ہی ختم کریں گےاس کے لئے پاکستان کی ضرورت نہیں پڑے گی۔

تفصیلات کے مطابق وزیراعظم عمران خان نے پنڈدادنخان میں جلال پور کینال منصوبے کا سنگ بنیاد رکھنے کی تقریب سے خطاب کرتے ہوئے لائن آف کنٹرول پر پاک فوج کے جوانوں کی شہادت پر ان کے درجات کی بلندی کیلئے دعا کی اور کہا کہ اللہ تعالیٰ ان کے لواحقین کو صبر جمیل عطا فرمائے۔

وزیراعظم نے کہاکہ میں بارہا کہہ چکا ہوں کہ انڈین وزیراعظم نریندر مودی نے گزشتہ کئی ماہ سے کشمیری لوگوں کے حقوق سلب کرکے ان کے علاقے کو جیل میں بدل دیا اور انھیں محصور کر رکھا ہے ۔

عمران خان نے یہ بھی کہا کہ مودی حکومت کشمیر کے مسئلے اور بھارتی انتشار سے توجہ ہٹانے کے لیے لائن آف کنٹرول کی خلاف ورزی کر رہا ہےاور  آرمی چیف جنرل قمر باجوہ باجوہ ان حالات سے نمٹنے کے لیے تیار ہیں۔

وزیراعظم کا کہنا تھا کہ نریندر مودی نے پہلے گجرات میں ہزاروں مسلمانوں کا قتل کرایا، اب وہ کشمیر میں نہتے مسلمانوں کا قتل عام کر رہا ہے اور   جرمنی کے اندر ہٹلر نے یہودیوں سے جو ظلم کیا، وہی مودی مسلمانوں کے خلاف کرنے جا رہا ہے۔

سال 2020 ترقی کا سال ہوگا، عمران خان

ملک کی معاشی صورتحال پر بات کرتے ہوئے عمران خان نے کہا کہ ایک سال بڑا مشکل وقت گزارا،سابق حکومتوں نے پاکستان کے قرضے کو چار گنا بڑھایااس لئے ہمارا آدھا پیسہ سابق حکومتوں کے قرضوں کے سود کی مد میں چلا گیا۔

سابق حکمرانوں کو تنقید کا نشانہ بناتے ہوئے وزیراعظم کا کہنا تھا کہ دس سال اس قوم پر ظلم ہوا،ملک سے پیسہ بیرون ملک منتقل کیا گیا لیکن آج اللہ کا شکر ہے روپے کی قدر مستحکم ہو رہی ہے۔

عمران خان کا یہ بھی کہنا تھا کہ ہماری ایکسپورٹ آج بڑھ رہی ہے اور پاکستان میں سرمایہ کاری آ رہی ہے، اللہ نے پاکستان کو بے شمار وسائل سے نوازا ہے جبکہ   2020ء میں ترقی اور خوشحالی آئے گی اور یہ نوکریاں دینے اور ترقی کرنے کا سال ہوگا۔

وزیراعظم عمران خان کا مزید  کہنا تھا کہ تبدیلی اور اصلاحات لانا آسان نہیں ہوتی،جب ایسے اقدامات اٹھاتے ہیں تو راستے میں مافیا کھڑا ہو جاتا ہےاور  یہ مافیا ایف بی آر اور سیاست دانوں سمیت ہر جگہ موجود ہےاسلئے  اپوزیشن کو ڈر ہے کہ اگر حکومت کامیاب ہو گئی تو یہ جیلوں میں جائیں گے۔