وفاقی وزیر ریلوے شیخ رشید احمد نے کہا ہے کہ سب کہہ رہے ہیں مریم بی بی بیرون ملک جا رہی ہیں لیکن مجھے نہیں لگتا۔

تفصیلات کے مطابق وزیر ریلوے شیخ رشید نے گزشتہ دن ایک ٹی وی چینل کو انٹر ویو دیتے ہو ئے کہا کہ کابینہ کی صورت حال بتا رہا ہوں، مریم نواز کے لیے ووٹ نہیں ہے، وفاقی کابینہ میں نواز شریف کے لیے 16 ووٹ تھے، منگل تک مریم نواز جاتی نظر نہیں آ رہیں، مریم کیوں خاموش ہے، یہ ساری قوم جانتی ہے، ان کے لیے خاموشی ہی بہترین عبادت ہے۔

ذرائع کے مطابق شیخ رشید نے کہا کہ ن لیگ بزدلوں کی جماعت ہے، کہاں گیا ان کا بیانیہ، بیمار نواز شریف ہے لیکن شہباز شریف بھی باہر گئے ہیں، ملک میں کوئی ہنگامہ نہ ہوا تو شریف خاندان کی وطن واپسی میں بہت تاخیر دیکھ رہا ہوں۔

وزیر ریلوے نے کہا کہ ہر سیاست دان کے پیچھے چہرے ہوتے ہیں، یہی چہرے انھیں چلاتے ہیں، عمران خان سب کو ایک ساتھ راضی نہیں رکھتا، کسی بھی اے ٹی ایم کو عمران خان سے خوش نہیں دیکھا، ہر اے ٹی ایم کی کوئی نہ کوئی سوئی پھنسی ہوئی ہے، جنوری میں بڑے بڑے کیسز سامنے آنے والے ہیں، ٹرکوں کے حساب سے پیسے بھی پاکستان آ رہے ہیں۔

وفا قی وزیر نے کہا کہ بلاول بھٹو اخلاق سے گرے ہوئے جملے کہہ رہے ہیں، وزیر اعظم عمران خان سے متعلق ایسے جملے مناسب نہیں، ایسا نہ ہو کہ مجھے فرنٹ فٹ پر آنا پڑے، تحریک انصاف کوووٹ ہی احتساب کے لیے ملا ہے، احتساب سے پیچھے ہٹنے کا مطلب خان کا سیاست میں پیچھے ہٹنا ہوگا۔

انھوں نے مزید کہا کہ عمران خان کی سرپرستی میں حکومت 5 سال پورے کرے گی، عمران خان کےعلاوہ پی ٹی آئی میں کچھ نہیں ہے، کئی لوگ عمران خان کی وجہ سے رکن قومی اسمبلی بن گئے ہیں۔

شیخ رشید نے کہا کہ عثمان بزدار نے راولپنڈی میں لڑکیوں کے لیے یونی ورسٹی بنائی ہے، میں ذاتی طور پر عثمان بزدار اور فردوس عاشق سے خوش ہوں، بیوروکریسی نیب سے ڈری ہوئی ہے، چاہے پوری دنیا ناراض ہو جائے مشرف کو غدار اور کرپٹ نہیں سمجھتا۔