دنیا بھرمیں کرسمس کی تیاریاں عروج پرہیں اور مسیحی تہوار کےموقع پرصرف عیسائی مذہب سے تعلق رکھنے والے ہی نہیں بلکہ دیگر مذاہب کےپیروکار بھی حضرت عیسیٰ ابن مریم ؑ کے یوم ولادت کے موقع پران سےعقیدت مندی کااظہار کرتے ہیں۔

دنیا بھرمیں کرسمس کاآغاز ہوچکا ہے جس میں سب سے پہلے کرسمس نیوزی لینڈ میں منایا جاتا ہے اور رات کے 12بجنے سے پہلے کاونٹ ڈاون شروع ہوجاتا ہے۔ جس کےدو گھنٹےبعد آسٹریلیا میں بھی کرسمس کی مبارکبادیوں کی گونج ہوتی ہے۔

اس موقع پر رنگا رنگ تقریبات کے ساتھ گرجا گھروں میں خصوصی دعائیں کی جاتی ہیں۔ پاکستان میں بھی کرسمس کےموقع پر مسیحی برادری اپنےمذہبی تہوارکے موقع پرتیاریوں میں مصروف ہیں۔

 دنیا بھر کے دیگر ملکوں کی طرح پاکستان کی مسیحی برادری بھی کرسمس کا تہوار عقیدت اور احترام سے مناتی ہے۔گرجا گھروں میں خصوصی عبادات کا اہتمام بھی کیاجاتا ہے۔ کرسمس کیک اور تحائف کا تبادلہ بھی ہوتاہے۔

پاکستان میں اس سال بھی مسیحی برادری سے تعلق رکھنے والے افراد بڑی تعداد میں کرسمس کی تقریبات میں حصہ لے رہے ہیں۔ مسیحی برادری کے ساتھ اظہار یک جہتی کے لیئے کئی سیاسی، سماجی اور غیر سرکاری تنظیموں کی طرف سے بھی کرسمس کی تقریبات منعقد کی جا رہی ہیں۔

مشنری اسکولوں اور بڑےہوٹلوں میں بھی کرسمس کے پروگرام ہو رہے ہیں۔کرسمس کے موقع پر اسکولوں کے بچوں نے اس دن کی مناسبت سے خصوصی ڈرامے اور ٹیبلوز بھی تیار کر رکھےہیں۔ جگہ جگہ کرسمس ٹری بھی بنائے گئے ہیں۔

کرسمس کی اصل خوبصورتی تو خوشیوں کو ایک دوسرے کے ساتھ شئیر کرنا ہے۔ دنیا بھر میں یہ دن ولادت مسیح کی خوشی میں منایا جاتا ہے۔

پاکستان میں مسیحی برادری کی تعداد تیس لاکھ کے قریب بتائی جاتی ہے۔ زیادہ تر مسیحی افراد متوسط یا غریب طبقوں سے تعلق رکھتے ہیں۔ کرسمس کے رنگا رنگ تہوار پر لوگ ایک دوسرے کو پھول ،کارڈز اور مٹھائیاں بھی تقسیم کرتے ہیں۔