مسلم لیگ (ن) کے جنرل سیکرٹری اور سابق وزیر داخلہ احسن اقبال نے گفتگو کرتے ہو کہا کہ یہ حکومت پارلیمنٹ کو یونین کونسل کی طرح چلا رہی ہے، اپنی مرضی سے بغیر شیڈول اجلاس بلاتے ہیں اور پھر ملتوی بھی کر دیتے ہیں۔

لیگی رہنما میاں احسن اقبال کا کہنا تھا کہ حکومت کا غیر سنجیدہ رویہ ہے،سب آرڈینینسز کے ذریعے قانون سازی کی جا رہی ہے جبکہ اداروں کی مضبوطی کا نعرہ لے کر آنے والے اداروں کو کھوکھلا کیا جارہا ہے۔

ان کا کہنا تھا کہ اداروں کو غیر فعال کرنے سے ملک میں  گورنس کا بحران گہرے سے گہرا ہوتا جارہا ہے۔

انہوں نے کہا کہ آرمی چیف کی توسیع کے متعلق سپریم کورٹ کے تفصیلی فیصلے پر مسلم لیگ ن کی مشاورت جاری ہے جبکہ ن لیگ کی جانب سے سپریم کورٹ کے فیصلے پر اپوزیشن جماعتوں کو اعتماد میں لینے کا فیصلہ بھی کیا گیا ہے۔

 احسن اقبال کا مزید کہنا تھا کہ ن لیگ اپنی قانونی ٹیم سے بریفنگ لینے کے بعد اپوزیشن جماعتوں سے مشاورت کریں گی۔

انہوں نے کہا کہ  آرمی چیف کی توسیع کا معاملہ حساس ہے لیکن ہم کوشش کریں گے کہ تمام جماعتیں اتفاق رائے سے اپنا موقف ترتیب دیں۔

انہوں نے بتایا کہ فوج کا معاملہ ہے اس پر اتفاق رائے ہونا چاہیے امید ہے اس معاملے پر حکومت سنجیدگی کا مظاہرہ کرے گی۔

رہنما مسلم لیگ ن کے رہنما نے الیکشن کمیشن کے معاملے پر بات چیت کرتے ہوئے کہا ہے کہ اگر حکومت ہٹ دھرمی نہ کرے تو 24 گھنٹوں میں اس کا فیصلہ ہو سکتا ہے، امید ہے حکومت اپوزیشن کی تجاویز پر غور کرے گی۔

 واضح رہے کہ ملک کے دو اہم معاملات پر فیصلہ سنائے جانے پر مسلم لیگ ن کی جانب سے اہم مشاورتی اجلاس جاری تھا جس کے متعلق احسن اقبال نے بریفنگ دی۔