وزیرِاعظم عمران نے کہا ہے کہ غیر استعمال شدہ اربوں کی جائیدادوں کو مثبت طریقے سے برؤے کار لانا حکومت کی ترجیح ہے۔

تفصیلات کے مطابق وزیرِاعظم عمران کی زیر صدارت اعلیٰ سطحی اجلاس ہوا ، جس میں مختلف وزراتوں اور وفاقی حکومت کے اداروں کی غیر استعمال شدہ املاک کو مثبت طور سے برؤے کار لانے کے حوالے سے جائزہ لیا گیا۔

اجلاس میں وزیر برائے بحری امور علی حیدر زیدی، وزیرِ نجکاری میاں محمد سومرو، معاونِ خصوصی برائے اوورسیز پاکستانیز سید ذاولفقار عباس بخاری ، معاون خصوصی برائے اطلاعات ڈاکٹر فردوس عاشق اعوان، ترجمان وزیرِ اعظم ندیم افضل چن، وفاقی سیکرٹری صاحبان،  وفاقی اور صوبائی سینئر افسران شریک ہوئے۔

اس موقع پر سیکرٹری نجکاری رضوان ملک نے اجلاس میں مختلف وزاتوں اور وفاقی حکومت کے محکموں کے اداروں کی متعدد املاک کو مثبت طریقے سے برؤے کار لانے اور ان کی ممکنہ نجکاری کے حوالے سے اب تک کی پیش رفت سے آگاہ کیا۔

سیکرٹری نجکاری کا کہنا تھا کہ وفاقی کابینہ کی جانب سے فروری اور مارچ میں لیے جانے والے فیصلوں کی روشنی میں  ہر وزارت کو کم از کم تین املاک کی نشاندہی کرنے کی ہدایت کی گئی تھی، پہلے مرحلے میں مختلف وزارتوں کی جانب سے اب تک 32املاک کی نشاندہی کی گئی ہے۔

سیکرٹری نجکاری کا یہ بھی کہنا تھا کہ جائیدادوں کے حوالے سے مستقبل کے لائحہ عمل کو حتمی شکل دینے کے لئے فنانشل ایڈوائزر کی خدمات اکتوبر کے آخر میں حاصل کی گئی جبکہ ان املاک کی مارکیٹنگ دبئی ایکسپو میں کی جائے گی تاکہ بیرون ملک مقیم پاکستانیوں اور سرمایہ کاروں کی توجہ ان بیش بہا اثاثوں کی جانب مبذول کرائی جا سکے۔

وزیراعظم عمران خان نے اجلاس سے خطاب کرتے ہوئے کہا کہ حاصل ہونے والی آمدنی کو عوام کی فلاح و بہبود اور سکولوں، کالجوں، ہسپتالوں جیسی بنیادی سہولتوں کی بہتری کے لئے استعمال کرنا موجودہ حکومت کی پالیسی کا اہم جزو ہے۔

عمران خان نے کہا کہ اربوں کی جائیدادوں کے باوجود وفاقی حکومت کے مختلف ادارے اربوں روپے کا سالانہ خسارہ اٹھا رہے ہیں جبکہ ماضی میں ان بیش قیمت جائیدادوں کو استعمال میں نہ لاکر مجرمانہ غفلت کا مظاہر ہ کیا گیا

عمران خان نے یہ بھی کہا کہ غیر استعمال شدہ املاک کی نشاندہی نہ کرنے والے یا ان کو مثبت طریقے سے برؤے کار لانے میں رکاوٹ پیدا کرنے والے سرکاری افسران و ذمہ داران کے خلاف سخت کاروائی عمل میں لائی جائے گی۔

  وزیراعظم عمران خان نے مزید کہا کہ نشاندہی کی جانے والی املاک سے متعلقہ تمام امور کو آئندہ ایک ہفتے میں حل کیا جائے اور ان املاک کو مثبت طریقے سے برؤے کار لانے کے فیصلے پر عمل درآمد مکمل کیا جائے۔