پولیس نے دعا منگی اغواء کیس میں مبینہ طور پر استعمال ہونے والی گاڑی شاہراہ فیصل کے قریب سے برآمد کرلی ہے۔

تفصیلات کے مطابق کراچی سینئر سپرٹنڈنٹ آف پولیس (ایس ایس پی) ایسٹ تنویر عالم اوڈھو اور دعا منگی کیس کی خصوصی تفتیشی ٹیم جائے واقعہ پر پہنچ گئے۔

ذرائع کے مطابق ایس ایس پی تنویر عالم اوڈھو کا کہنا ہے کہ گاڑی لاوارث حالت میں ملی ہے اس کا فرانزک کرایا جائے گا، ملزمان گاڑی چھوڑ کر فرار ہوگئے ہیں تاہم گاڑی سے فنگر پرنٹس حاصل کر لیے گئے ہیں۔

پولیس حکام کا کہنا ہے کہ ملنے والی گاڑی دعا منگی کے اغوا میں استعمال ہونے والی گاڑی سے بہت مماثلت رکھتی ہے تاہم اس کی دونوں نمبر پلیٹس اتری ہوئی ہیں۔

 واضح رہے کہ ڈیفنس کے علاقے بڑا بخاری میں واقع اوپن ایئر ریسٹورنٹ سے اغوا ہونے والی لڑکی دعا نثار منگی کیس میں پولیس نے گزشتہ روز 22 افراد کے بیانات قلم بند کیے تھے۔

واضح رہے کہ دعا منگی کو اغوا ہوئے 4 روز ہو گئے ہیں، ایسا لگتا ہے کہ دعا کو آسمان نگل گیا یا زمین کھا گئی ہو، اب تک دعا بازیاب نہ ہو سکی، پولیس کی تحقیقات بیانات قلم بند کرنے اور سی سی ٹی وی فوٹیجز کا جائزہ لینے سے آگے نہ بڑھ سکی، پولیس نے مزید 2 افراد کو حراست میں لے کر نامعلوم مقام پر منتقل کر دیا ہے۔

‘اغواء کے وقت دعامنگی کی بہن بھی موقع پر موجود تھی’

کراچی میں ڈیفنس کے علاقے سے اغوا ہونے والی دعا منگی کیس میں اب تک 22 افراد کا بیان ریکارڈ کیا جا چکا ہے، دعا کے والد کا کہنا ہے کہ 10 روز پہلے دعا کا مظفر نامی لڑکے سے جھگڑا ہوا تھا، جس کے بعد دعا کو اغوا کیا گیا۔ پولیس کا کہنا ہے کہ ابتدائی تحقیقات کے مطابق واقعہ اغوا برائے تاوان نہیں بلکہ بدلہ لینے کا لگتا ہے۔

خیال رہے کہ وزیر اعلیٰ سندھ مراد علی شاہ کے نوٹس لینے کے بعد اس کیس کی تحقیقات کرنے کے لیے اینٹی وائلنٹ کرائم سیل کی خدمات حاصل کر لی گئی ہیں۔