پنجاب کابینہ نے پنجاب لوکل گورنمنٹ فنانس کمیشن کے قیام کی منظوری دے دی۔

تفصیلات کے مطابق  وزیراعلیٰ پنجاب سردار عثمان بزدار کی زیرصدارت صوبائی کابینہ کا 21واں اجلاس منعقد ہواجس میں پنجاب کابینہ کی جانب سے کوڈ آف کریمنل پروسیجرمیں ترمیم کی منظوری دے دی گئی۔

کوڈ آف کریمنل پروسیجرمیں ترمیم کے بعدفرسٹ کلاس مجسٹریٹ کوپرائس کنٹرول کے اختیارات تفویض کیے جاسکیں گے۔

 ضلع قصورکی تحصیل کوٹ رادھا کشن اورضلع سرگودھا کی تحصیل کوٹ مومن میں سیشن کورٹ کے قیام کے فیصلے کی توثیق ہوئی ہے جبکہ ڈیرہ غازی خان اور راجن پور میں قبائلی علاقوں کیلئے پولیس رولز1934میں ترمیم کی منظوری دی گئی ہے۔

اسلامی جمہوریہ پاکستان کے 1973کےآئین کے آرٹیکل 158اور172(3)کے تحت قدرتی گیس کے ترجیحی بنیادوں پراستعمال کے حوالے سے سفارشات کی منظوری بھی دی گئی ہے۔

حکومت بلوچستان کی درخواست پرموسیٰ خیل،سورہ اورخضدارساؤتھ کے مختلف بلاکوں کیلئے معدنی وسائل کی تلاش کیلئے سفارشات کی توثیق کی گئی ہے۔اس کے علاوہ  آئل اینڈ گیس ریگولیٹری اتھارٹی آرڈیننس2002میں ترامیم کے حوالے سے سفارشات وفاقی حکومت کو بھجوائی جائیں گی۔

 ایشیائی ترقیاتی بینک کی جانب سے ہنرمند فورس کی تربیت کیلئے فنی معاونت کامعاملہ کابینہ کمیٹی برائے فنانس اینڈ ڈویلپمنٹ کو بھجوانے کافیصلہ کیاگیاہے۔ کابینہ کمیٹی تمام امور کا جائزہ لے کر اپنی حتمی سفارشات پیش کرے گی۔

اجلاس میں پرائس کنٹرول کے حوالے سے کارکردگی اورصورتحال پر بھی غورکیاگیا۔ اجلاس میں صوبائی کابینہ کے20ویں اجلاس کے منٹس کی توثیق کی گئی۔

کابینہ اسٹینڈنگ کمیٹی برائے فنانس اینڈ ڈویلپمنٹ کے 17ویں اجلاس کے فیصلوں کی بھی توثیق کی گئی ہے۔

اجلاس کے دوران وزیراعلیٰ پنجاب عثمان بزدارنےکابینہ کوہدایت دیتے ہوئےکہاکہ عوام کوریلیف دینےکیلئے آپ سب نے ایک ٹیم کے طورپر کام کرنا ہے۔

وزیراعلیٰ عثمان بزدارکاکہناتھا کہ انسداد پولیومہم کو کامیاب بنانے کیلئے بھی متعلقہ محکمے بھر پور کردارادا کریں۔

انہوں نےپنجاب حکومت کی کارکردگی تعریف کرتے ہوئے کہا کہ دیگر صوبوں کے مقابلے میں پنجاب حکومت بہت بہتر ہے۔

وزیراعلیٰ نے بتایاکہ اگلےہفتے سےمختلف شہروں کے دورے شروع کررہا ہوں، میں نے چیف سیکرٹری اورانسپکٹرجنرل پولیس کو بااختیار بنایا ہے۔

وزیراعلیٰ نے کہا کہ نچلی سطح پرسروس ڈیلیوری میں بہتری نظر آنی چاہیے،منتخب نمائندوں کے جائز مسائل ترجیحی بنیادوں پر حل کیے جائیں گے۔

واضح رہے کہ اجلاس میں صوبائی وزراء،مشیران،معاونین خصوصی،چیف سیکرٹری اورمتعلقہ محکموں کےسیکرٹریزنےشرکت کی۔