شاہد خاقان عباسی کا کہنا ہے کہ نئےپاکستان میں عوام روٹی کھانا چھوڑ دیں۔

تفصیلات کے مطابق اسلام آباد کی احتساب عدالت میں ایل این جی کیس کی سماعت کے موقع پرسابق وزیرِ اعظم اور مسلم لیگ ن کے مر کزی رہنما شاہد خاقان عباسی کا کہنا ہے کہ نئے پاکستان کے لیے ووٹ دیا ہے تو اب عوام بھگتیں۔

 شاہد خاقان نے عدالت میں اپنی پیشی کے بعد میڈیا سے با ت چیت کرتے ہوئے کہا کہ میری کسی سے کیا ناراضی ہو سکتی ہے؟

ایل این جی کیس، شاہد خاقان عباسی کے جوڈیشل ریمانڈ میں 21 جنوری تک توسیع

سابق وزیرِ اعظم نے کہا کہ حکومت کا ہر دن پاکستان کے عوام پر بھاری ہوگا،حکومت اپنی ناکامی پر شرمندہ بھی نہیں، آٹا نہیں دے سکتے تو شرمندہ تو ہو جائیں، نئےپاکستان میں عوام روٹی کھانا چھوڑ دیں۔

مسلم لیگ ن کے مر کزی رہنما نے کہا کہ  نیا پاکستان ہے، آٹا70روپے کلو بک رہا ہے، لوگ روٹی کھانا چھوڑ دیں، مسئلہ ہی ختم ہو جائے گا۔

صحافی نے شاہد خاقان سے سوال کیا کہ مولانا فضل الرحمٰن کہتے ہیں کہ اپوزیشن سے مایوس ہوں، کیا آپ مایوس ہیں؟

انھوں نے جواب دیتے ہوئے کہا کہ اپوزیشن لیڈر نے معاملات اٹھانا ہوتے ہیں، اسمبلی چل ہی نہیں رہی کہ اسمبلی میں کوئی بات کریں، اسپیکر صاحب اجلاس ختم کر دیتے ہیں۔

سابق وزیرِ اعظم نے مزید کہا کہ اسمبلی میں صرف ایک بل بڑی عجلت سے پاس ہوا، الیکشن کمیشن ارکان کی تقرری کے حوالے سے بیٹھ کر بات کرنا اچھا ہے۔