وزیراعظم عمران خان نے کہا ہے کہ زراعت اورکسانوں کا تحفظ  حکومت کی اولین ترجیح ہے۔

تفصیلات کے مطابق ملک میں ٹڈی دل کے حملے سے نمٹنے کے لئے وزیرِ اعظم عمران خان کی زیر صدارت  اعلیٰ سطحی اجلاس ہوا۔

اس موقع پر ٹڈی دل کے خاتمے کے لئے نیشنل ایکشن پلان منظورکیا گیا جبکہ ٹڈی دل کے خطرے سے نمٹنے کے لئے حکومت کا ٹڈی دل  کے حوالے سے نیشنل ایمرجنسی ڈیکلیئر کرنے کا فیصلہ کیا گیا جبکہ ٹڈی دل کے تدارک کے لئے وفاق کی سطحی پر اقدامات کے حوالے سے  اعلیٰ سطحی کمیٹی قائم کی گئی۔

اجلاس میں وزیرِ اعظم کو ملک کے مختلف حصوں میں ٹڈی دل کے خطرے اور ٹڈی دل کے خاتمے کے لیے  ترتیب دیے گئے نیشنل ایکشن پلان کے حوالے سے تفصیلی بریفنگ دی گئی۔

بریفنگ  میں کہا گیا کہ مجوزہ نیشنل ایکشن پلان میں وفاقی  ، صوبائی اور ضلعوں کی سطح پر ذمہ داریوں کا تعین کردیا گیاجبکہ نیشنل ڈیزاسٹر منیجمنٹ اتھارٹی، صوبائی ڈیزاسٹر منیجمنٹ اتھارٹیز، وفاقی و صوبائی محکمہ جات کی ذمہ داریاں مقرر کر دی گئی ہیں۔

وزیراعظم نے 70 لاکھ مستحق خواتین کے لیے احساس کفالت پروگرام کا افتتاح کردیا

وزیرِ اعظم کو بریفنگ  میں مزید بتایا گیا  کہ کمیٹی کے چئیرمین سیکرٹری فوڈ سیکورٹی ہوں گے اور چئیرمین این ڈی ایم اے کو ٹڈی دل کے خاتمے کے حوالے سے فوکل پرسن تعینات کر دیا گیا۔

اجلاس میں عمران خان نے کہا کہ فصلوں کو کسی بھی خطرے سے بچانے کے لئے اقدامات کیے جائیں، ٹڈی دل کے خطرے سے نمٹنے کے لئے وفاقی حکومت ہر ممکنہ اقدامات اٹھائے گی۔

وزیراعظم عمران خان نے مزید کہا کہ ٹڈی دل کے باعث زراعت کو ہونے والے نقصانات کے پیش نظر تمام ضروری اقدامات ہنگامی طور پر کیے جائیں جبکہ حکومت مطلوبہ وسائل فراہم کرے گی۔

اجلاس میں  مخدوم خسرو بختیار، عبدالحفیظ  شیخ، ڈاکٹر فردوس عاشق اعوان، چیئرمین این ڈی ایم اے لیفٹینٹ جنرل محمد افضل اور وفاقی و صوبائی  حکومتوں کے سینئر افسران شریک ہوئے۔