شاہ محمود قریشی نے کہا ہے کہ پاکستان خطے میں کسی جنگ کا حصہ نہیں بنے گا۔

تفصیلات کے مطا بق وزیر خارجہ شاہ محمود قریشی ایران کے دورے پر پہنچے جہاں انہوں نے ایرانی صدر ڈاکٹر حسن روحانی سے ملاقات کی۔

ملاقات کے دوران ایران امریکا کشیدگی، خطے میں امن و استحکام کی صورتحال اور پاک ایران تعلقات پر تبادلہ خیال کیا گیا۔

وزیرخارجہ ایران اور سعودی عرب کے دورے پرروانہ

ایرانی صدر نے پاکستان کی قیام امن کی کوششوں کو بھی سراہا۔

ذرائع کے مطابق  شاہ محمود قریشی کا تہران کے ہوائی اڈے پر ایران وزارت خارجہ کے ڈائریکٹر جنرل (ڈی جی) سید رسول موسوی نے استقبال کیا۔

شاہ محمود قریشی تہران میں اپنے دورے کے دوران ایرانی قیادت سے ملاقاتیں کریں گے اور ایران امریکہ کشیدگی میں کمی اور مشرق وسطیٰ میں قیام امن کے حوالے سے تبادلہ خیال کیا جائے گا۔

واضح رہے کہ وزیر خارجہ شاہ محمود قریشی ایران کے بعد سعودی عرب کا بھی دورہ کریں گے اور وہ یہ دورے وزیر اعظم عمران خان کی ہدایت پر کر رہے ہیں تاکہ مشرق وسطیٰ میں جاری کشیدگی کو کم کرنے میں پاکستان اپنا کردار ادا کر سکے۔

وزیر خارجہ کل صبح ایران کے دورے پر روانہ ہوئے تھے جہاں انہوں نے پہلے ایران کے شہر مشہد کا دورہ کیا اور پھر تہران پہنچے۔

وزیر خارجہ مخدوم شاہ محمود قریشی ایران میں اپنے ایرانی ہم منصب جواد ظریف سے بھی ملاقات کریں گے اور ان سے مشرق وسطیٰ اور خلیجی خطے میں امن و امان کی صورتحال پر تبادلہ خیال کریں گے۔

 وزیر خارجہ شاہ محمو د قریشی 13 جنوری کو تہران سے ریاض جائیں گے جہاں وہ سعودی وزیر خارجہ شہزادہ فیصل بن فرحان بن آل سعود سے ملاقات کریں گے اور ان کے ساتھ ایران امریکہ کشیدگی سمیت علاقائی امن و استحکام کے موضوعات پر تبادلہ خیال کریں گے۔

واضح  رہے کہ وزیراعظم عمران خان نے چند روز قبل سماجی رابطے کی ویب سائٹ ٹویٹر پر ٹویٹ کرتے ہوئے کہا تھا کہ میں نے وزیر خارجہ شاہ محمود قریشی کو ہدایت کی ہے کہ وہ ایران، سعودی عرب اور امریکا کا دورہ کریں۔

میں نے ہدایات دی ہیں کہ وزیرخارجہ ایران، سعودی عرب اور امریکہ جاکر ان ممالک کے وزرائے خارجہ سے ملیں جبکہ آرمی چیف متعلقہ عسکری قائدین سے روابط قائم کریں اور واضح پیغام دیا جائے کہ: پاکستان امن کیلئے اپنا کردار ادا کرنے کو تو تیار ہے مگر وہ دوبارہ کسی بھی جنگ کا حصہ نہیں بن سکتا۔

— Imran Khan (@ImranKhanPTI) January 8, 2020

اس ہدایت کے بعد وزیرخارجہ شاہ محمود قریشی نے مختلف ممالک کے وزرائے خارجہ سے رابطے کیے اور مشرق وسطی میں کشیدگی کے بعد سفارتی محاذ پر اپنا کردار ادا کرنے کی تیاریاں شروع کر دی ہیں۔