ترجمان دفتر خارجہ عائشہ فاروقی نے پاکستان میں اقلیتوں سے متعلق بھارتی بے بنیاد پروپیگنڈا کو سختی سے مسترد کردیا ہے۔

تفصیلات کے مطابق ترجمان دفتر خارجہ عائشہ فاروقی نے اپنے ایک بیان میں کہا کہ پاکستان میں سکھ مذہب سمیت تمام مذاہب کی عبادت گاہوں کو مکمل احترام حاصل ہے، ننکانہ صاحب میں حملے سے متعلق بھارتی الزامات اور من گھڑت پروپیگنڈے کو یکسر مسترد کرتے ہیں۔

ترجمان دفتر خارجہ  نے کہا کہ پشاور اور ننکانہ صاحب میں انفرادی واقعات کو اقلیتوں کی صورتحال سے جوڑنے کی کوشش پاکستان مخالف ایجنڈے کا حصہ ہے جبکہ بھارتی پروپیگنڈا  مقبوضہ کشمیر کی سنگین صورتحال سے توجہ ہٹانے کی کوشش ہے

عائشہ فاروقی  نے یہ بھی کہا کہ گردوارہ ننکانہ صاحب پر کسی بھی حملے یا بے حرمتی کے الزامات مسترد کرتے ہیں، پاکستان پر الزامات جھوٹ، آرایس ایس اور بی جے پی کی پروپیگنڈا مہم کا حصہ ہیں۔

ہندو توا: مودی کی پالیسی سے خطے کا امن خطرے میں ہے

پاکستانی دفتر خارجہ کی جانب سے جاری بیان میں کہا گیا کہ بھارت میں اقلیتوں کے ساتھ منظم طریقے سے امتیازی سلوک کیا جا رہا ہے، ایسی باتیں بی جے پی حکومت کو تحفظ نہیں دی سکتیں۔

عائشہ فاروقی نے یہ بھی کہا کہ دنیا بھر میں سکھ کمیونٹی پاکستان کی اقلیتوں کے حقوق سے متعلق وژن سے آگاہ ہے، نومبر 2019 میں وزیراعظم کی جانب سےکرتارپورراہداری کا افتتاح اسی وژن کا عکاس ہے ۔

جاری بیان میں مزید عائشہ فاروقی کا کہنا تھا  کہ پاکستانی سکھ نوجوان کی ٹارگٹ کلنگ کو سیاسی رنگ دینے کی بھارتی کوشش بھونڈی ہے، واقعہ کے فوری بعد مقدمہ درج کر کے اعلیٰ سطح کی کمیٹی تشکیل دے دی گئی ہے، قانون اپنا راستہ اختیار کرے گا اور ذمہ داران کے خلاف کارروائی کی جائے گی۔

ترجمان دفتر خارجہ عائشہ فاروقی  کا مزید کہنا تھا کہ کہ بھارت میں منصوبہ بندی کے تحت اقلیتوں سے امتیازی سلوک کیا جارہا ہے جب کہ پاکستان میں سکھوں سمیت تمام مذاہب کی عبادت گاہوں کی تعظیم کی جاتی ہے۔