شیخ رشید نے کہا ہے کہ نومبر ، دسمبر میں لوگ زیادہ روٹیاں کھاتے ہیں جس کی وجہ سے آٹا مہنگا ہوتا ہے۔

تفصیلات کے مطابق وفاقی وزیر ریلوے شیخ رشید آٹے بحران کی دلچسپ وجہ ڈھونڈ لائےہیں اور انھوں نے لاہور میں پریس کانفرنس کے دوران کہا کہ نومبر ، دسمبر میں لوگ زیادہ روٹیاں کھاتے ہیں جس کی وجہ سے آٹا مہنگا ہوتا ہے، احتساب کے بجائے سستا آٹا اور سستی بجلی دیتے تو لوگ مطمئن ہوجاتے۔

سال نو کا تحفہ،آٹا بھی مہنگا

شیخ رشید کا کہنا ہے کہ گیس نہیں ہے اور آٹا بھی مہنگا ہے لیکن عمران خان کے علاوہ آپشن نہیں۔

 پریس کانفرنس کے دوران وزیر ریلوے نے کہا کہ شہباز شریف جس کام کے لیے لندن گئے ہیں انہیں وہ کرنے دیں، مریم نواز اور شہباز شریف کے خلاف سنجیدہ کیسز آنے والے ہیں۔

 شہبازشریف میری پارٹی کے آدمی ہیں جب میں کہوں تب ہی واپس آئیں اور اگر وہ واپس آنا چاہتے ہیں تو اسلام علیکم۔

یہ سارے لوگ سوچ سمجھ کر ہی باہر گئے ہیں، میں نے کہا تھا کہ تابوت بھی یہیں سے نکلے گا اور ثبوت بھی، سا بق وزیر اعظم نواز شریف نہیں آرہے اور مریم نواز فی الحال اپنے والد کے پاس نہیں جارہیں۔

وزیراعلیٰ پنجاب عثمان بزدار سے متعلق سوال پر شیخ رشید کا کہنا تھا کہ میں عمران خان کا اتحادی ہوں پی ٹی آئی کا ترجمان نہیں، جب تک عمران خان عثمان بزدار کے ساتھ ہیں میں بھی ساتھ ہوں، فواد چوہدری بڑے آدمی میں ہیں، ان میں ہمت ہے اسی لیے انہوں نے سب کے سامنے یہ بات کہہ دی۔

آٹے کے بحران اور بڑھتی مہنگائی پرتبصرہ کر تے ہو ئے وفاقی وزیرشیخ رشید نے کہا کہ  آئی ایم ایف ایک مجبوری ہے، گیس نہیں ہے اور آٹا بھی مہنگا ہے لیکن عمران خان کے علاوہ آپشن نہیں، عمران خان کے علاوہ کوئی متبادل نہیں، مہنگائی ختم کرنے کے لیے ہمیں تین سال کا وقت دیں جن میں سے ڈیڑھ برس گزر گیا ہے۔