وزیر اعظم عمران خان نے آج معا شی ٹیم کا اجلا س طلب کر لیاہے۔

تفصیلات کے مطابق طلب کیے گئے اس معاشی ٹیم کے اجلا س میں وزیر اقتصادی امور،مشیر خزانہ،چئیر مین ایف بی آراور دیگر اعلیٰ حکام شرکت کریں گے  تاہم اجلاس میں وزیر اعظم عوام کو مہنگائی سے ریلیف دینے کے لیے ہدایات دیں گے۔

ذرائع کے مطابق اس اجلاس میں مہنگائی اور عوام کو ریلیف دینے سے متعلق اقدامات کا جائزہ بھی لیا جائے گا۔

یا درہے کہ دو ماہ قبل ہی وزیراعظم نے سماجی رابطے کی ویب سائٹ فیس بک پر اپنے ایک پیغام میں کہا تھا کہ انھیں معاشی ٹیم پر فخر ہے، 4ماہ میں کرنٹ اکاونٹ خسارہ ختم ہونے سے روپے کی قدر میں 4روپے اضافہ ہوا، معاشی ٹیم اپنی بھرپور کوششیں جاری رکھے۔

اس کے ساتھ ساتھ اسٹاک مارکیٹ کے حوالے سے وزیر اعظم کا کہنا تھا کہ گذشتہ تین ماہ کے دوران پاکستان کی اسٹاک مارکیٹ میں 30 فیصد تقریبا 10،000 پوائنٹس کا اضافہ ہوا، یہ ترقی حکومت کی جانب سے معیشت کو مستحکم کرنے کے اقدامات کے نتیجے میں سامنے آئی ہے۔

واضح رہے کہ حال ہی میں گورنر پنجاب چوہدری محمد سرور نے بھی کہا کہ معاشی سیکٹر میں حکومت کامیاب ہے جبکہ معاشی ٹیم کی کارکردگی سے سامنے آنے والے نتائج کو عالمی سطح پر تسلیم کیا جا رہا ہے۔