کراچی بھر میں نجی اسکول 6 جنوری تک بند رکھنے کا اعلان کیاگیا ہے۔

تفصیلات کے مطابق چیئرمین آل پرائیویٹ اسکولز ایسو سی ایشن نے کراچی بھر میں نجی اسکول 6 جنوری تک بند رکھنے کا اعلان کیا ہے۔

ذرائع کے مطابق دوسری جانب سیکریٹری تعلیم سندھ چھٹیاں نہ بڑھانے کے اعلان پر قائم ہیں۔

چھٹیاں مل گئیں!

کراچی میں خون جمادینے والی سردی میں سرکاری اور نجی اسکول چھٹیوں کے معاملے میں تقسیم ہوگئے ہیں۔

ذرائع کے مطابق سیکریٹری تعلیم سندھ نےسخت سردی کے باوجود بچوں کی چھٹیاں نہ بڑھانے کا اعلان کیا ہے جبکہ شہر کے بیشتر نجی اسکولوں نے ازخود چھٹیوں میں اضافہ کردیا ہے۔

شہر قائد میں سرد موسم کی شدت میں اضافہ ہوا تو 50 فیصد سے زائد نجی اسکول یکم جنوری کو بند رہے جبکہ  آل پرائیویٹ اسکولز ایسو سی ایشن کے چیئرمین کے مطابق 6 جنوری تک اسکول بند رکھے جائیں گے۔

اس سلسلے میں کئی اسکولوں کی جانب سے پہلے سے والدین کو چھٹیوں سے متعلق آگاہ کر دیا گیا تھا۔

یکم جنوری کونجی اسکول بند رہے تاہم کھلنے والے سرکاری اسکولوں میں طلباء اور اساتذہ کی تعداد نہ ہونے کے برابر رہی۔

 والدین نے شدید ٹھنڈ میں محکمہ تعلیم کے اسکول کھولنے کے فیصلے کو سمجھ سےبالا تر قرار دیا ہے۔

دوسری جانب سیکریٹری تعلیم احسن منگی موسم سرما کی تعطیلات میں اضافے کو بے بنیاد قرار دیتے رہے۔

 موسم کی شدت کو دیکھتے ہوئے بیشتر نجی اسکولوں کی انتظامیہ نے 6 جنوری سے اسکول کھولنے کا اعلان کیا ہے۔

واضح رہے کہ کراچی میں سال نو کا استقبال تیز سائبرین ہواؤں نے کیا ہے، چیف میٹرولوجسٹ سردار سرفراز کا کہنا ہے کہ یکم جنوری جاڑے کا سرد ترین دن قرار پایا ہے۔

کراچی میں دن کے بارہ بجے درجہ حرارت 14 ڈگری سینٹی گریڈ ہے لیکن لوگوں کو درجہ حرارت 11 یا 12 ڈگری سینٹی گریڈ تک محسوس ہو رہا ہے۔