پاکستان مسلم لیگ (ن) کی ترجمان مریم اورنگزیب نے کہا ہے کہ عمران مافیا کی ذہنی حالت دیکھ کر ترس آتا ہے۔

ترجمان مسلم لیگ (ن) نے نوازشریف کی ضمانت میں توسیع کی درخواست مسترد کرنے کی مذمت کرتے ہوئے ایک بیان میں کہا کہ عمران مافیا نے پنجاب حکومت پر دباؤ ڈال کر زبردستی آج کا فیصلہ کروایا ہے۔ ‎

مریم اورنگزیب نے کہا کہ نواز شریف کا علاج ڈاکٹرز کی ہدایت پر ہو رہا ہے، اُن کے ڈاکٹر جیسے بہتر سمجھیں گے علاج ویسے ہی ہو گا۔

اپنے بیان میں پاکستان مسلم لیگ (ن) کی ترجمان نے یہ بھی کہا کہ وزیراعظم نواز شریف کو عدلیہ نے علاج کرانے کی اجازت دی جبکہ عدلیہ کے فیصلے اور قانونی تقاضوں کے مطابق تمام رپورٹس جمع کروادی گئی ہیں۔

 مریم اورنگزیب کا کہنا تھا کہ حکومت کے قاتلانہ ارادوں کے بارے میں کوئی شک نہیں اور ابن الوقت کرپٹ ٹولہ نامراد تھا، ہے اور رہے گا، اس لئے عمران مافیا تماشے بند کرے ۔

عمران مافیا اپنی نالائقی چھپانےکیلئے مخالفین کے گھروں پہ چھاپے ماررہا ہے، مریم اورنگزیب

پاکستان مسلم لیگ (ن) کی ترجمان نے کہا کہ ‎وزیراعظم نواز شریف نے ملک کو ترقی ، سی پیک ، کاروبار ، روزگار ، موٹر وے ، روشنیاں ، امن دیا  اور ملک و قوم کی خدمت اور محبت میں کوئی نوازشریف کا مقابلہ نہیں کرسکتا۔

مریم اورنگزیب نے یہ بھی کہا کہ آٹا اور چینی چوری کرنے والے ، ملک کا کاروبار، روزگار، معیشت تباہ کرنے والا عمران مافیا صرف نواز شریف کی صحت پہ سیاست کرنے والوں کے سینے حسد، بغض اور انتقام سے جلتے ہی رہیں گے۔

پاکستان مسلم لیگ (ن) کی ترجمان مریم اورنگزیب نے مزید کہا کہ ‎نوازشریف کو اللہ تعالی کا سہارا اور قوم کی محبتیں اور دعائیں ہیں۔،‎وزیراعظم نوازشریف صحت یاب ہوکر انشااللہ جلد لوٹیں گے۔