وزیر اعظم عمران خان سے اقوام متحدہ کے سیکریٹری جنرل انتونیو گوتریس کی ملاقات ہوئی ہے ۔

تفصیلات کے مطابق وزیراعظم عمران خان سے اقوام متحدہ کے سیکریٹری جنرل انتونیو گوتریس کی ملاقات ہوئی، ملاقات میں وزیر خارجہ شاہ محمود قریشی بھی شریک تھے۔

ملاقات میں باہمی دلچسپی کے امور اور مقبوضہ کشمیر کی صورتحال زیر غور آئی۔

واضح رہے اس سے قبل بھی افغان پناہ گزینوں کی میزبانی کے چالیس سال مکمل ہونے پر منعقد ہونے والی دو روزہ کانفرنس خطاب میں اقوام متحدہ کے سیکرٹری جنرل انتونیو گوتریس نے افغان پناہ گزینوں کی کامیاب واپسی کے لیے  افغانستان میں قیام امن کے عزم کی تجدید کی ضرورت پر زور دیا تھا۔

انتونیو گوتریس نے کہا تھا کہ پاکستان بدستور سب سے زیادہ پناہ گزینوں کی میزبانی کرنے والا دوسرا ملک ہے۔

اقوام متحدہ کے سیکرٹری جنرل نے یہ بھی کہا تھا کہ ہمیں اس بات کا اعتراف کرنا چاہیے کہ پاکستان کی خدمات کے مقابلے میں بین الاقوامی تعاون انتہائی کم ہے۔

انہوں نے مزید کہا تھا کہ وقت آگیا ہے کہ بین الاقوامی برادری مشترکہ ذمہ داری کے طور پر اقدامات کرے۔

اقوام متحدہ کے سیکرٹری جنرل کا افغانستان میں قیامِ امن کی تجدید پر زور

 یاد رہے کہ اقوام متحدہ کے سیکریٹری جنرل انتونیو گوتریس 4 روزہ دورے پر گزشتہ شب اسلام آباد پہنچے ہیں جہاں ایئر پورٹ پر اقوامِ متحدہ میں پاکستان کے مستقل مندوب منیر اکرم نے ان کا استقبال کیا۔

اقوامِ متحدہ کے سیکریٹری جنرل انتونیو گوتریس کا اپنے دورے کے حوالے سے ایک بیان میں کہنا تھا  کہ اکستان دنیا بھر میں امن کوششوں میں اقوامِ متحدہ کا قابلِ بھروسہ اور مستقل شراکت دار ہے،دورۂ پاکستان کا مقصد امن کے لیے پاکستانی عوام کی خدمات پر ان کا شکریہ ادا کرنا ہے۔

سیکریٹری جنرل اقوامِ متحدہ اپنے دورۂ پاکستان کے دوران وزیرِ اعظم عمران خان، وزیرِ خارجہ شاہ محمود قریشی اور دیگر رہنماؤں سے ملاقات کریں گے۔