فیاض الحسن چوہان کا کہنا ہے کہ بیگم صفدر اعوان نے بہت خدمت کرلی، اب بیٹوں کو موقع دیں۔

مریم کو والد کے پاس آنے دیا جائے، شہبازشریف کا مطالبہ

وزیراطلاعات پنجاب فیاض الحسن چوہان نے سابق وزیراعظم کی صحت کے بارے میں تبصرہ کر تے ہوئے کہا کہ ڈاکٹر عدنان کے ٹیکوں کی وجہ سے ہی آج نواز شریف کی صحت کا یہ حال ہے، بیگم صفدر اعوان نے بہت خدمت کرلی، اب بیٹوں کو موقع دیں۔

فیاض الحسن چوہان نے کہا کہ نواز شریف کا اصل مسئلہ بیماری نہیں، اپنے ٹبر کو احتساب سے بچانا ہے،حکومت آلِ شریف کی شاہی خواہشات کا مزید احترام نہیں کر سکتی۔

وزیراطلاعات پنجاب کا اپنے ایک بیان میں کہنا ہے کہ بیگم صفدر اعوان کو بچانے کے لیے آلِ شریف نت نئی تاویلیں پیش کر رہی ہے، بیگم صفدر اعوان کی غیر موجودگی میں نواز شریف کی علاج نہ کروانے کی ضد ڈرامے بازی ہے۔

انھوں نے کہا کہ بیگم صفدر اعوان مجرم ہیں، ایسے باہر جانے کی اجازت نہیں دی جا سکتی، عدلیہ اور حکومت نے ڈاکٹر عدنان اور مریم اورنگزیب کے واویلے کے بعد انسانی بنیادوں پر نواز شریف کو علاج کے لیے لندن جانے کی اجازت دی تھی۔

فیاض چوہان نے مزید کہا کہ کوٹ لکھپت جیل میں بیگم صفدر اعوان کی آمد کے بعد نواز شریف کی طبیعت مزید بگڑ جاتی تھی،ایسے میں بیگم صفدر اعوان کا لندن نہ جانا ہی نواز شریف کے لیے بہتر ہے۔

ان کا کہنا ہے کہ اب عدالتیں انہیں پکار رہی ہیں لیکن یہ بھائی، بیٹوں، سمدھی اور سارے خاندان سمیت لندن میں بیٹھے مزے کر رہے ہیں، ایسی کونسی خاص تیمارداری ہے جو بیگم صفدر اعوان نے کرنی ہے۔