کراچی کےعلاقے صدر میں واقع زینب انٹرنیشنل مارکیٹ کی دکانوں میں آگ لگ گئی، فائرفائٹرز کا آگ بجھانے میں مصروف ہیں، تاہم آگ مزید شدت اختیار کرتی جا رہی ہے۔

تفصیلات کے مطابق کراچی کے علاقے صدر میں مشہور زینب انٹرنیشنل مارکیٹ کی دکانوں میں لگنے والی آگ شدت اختیار کر گئی ہے، فائر بریگیڈ کی 4 گاڑیاں آگ پر قابو پانے میں مصروف ہیں جبکہ مزید گاڑیاں موقع پر روانہ کی جا رہی ہیں۔

آگ انٹرنیشنل مارکیٹ کی چوتھی منزل پر واقع دکانوں میں لگی ہے، فائر بریگیڈ حکام کے مطابق اس مارکیٹ میں گارمنٹس کی دکانیں اور گودام ہیں، پولیس کا کہنا ہے کہ واقعے میں کسی قسم کے جانی نقصان کی اطلاع نہیں ملی۔

کراچی ٹریفک پولیس کا کہنا ہے کہ زینب مارکیٹ کے سامنے انٹرنیشنل مارکیٹ میں آتشزدگی کے باعث فوارہ چوک سے اس طرف آنے والے ٹریفک کو ایوان صدر روڈ کی جانب منتقل کر دیا گیا ہے۔

صدر انٹرنیشنل مارکیٹ میں لگنے والی آگ بجھانے کیلئے فائربریگیڈ نے واٹر بورڈ سے مدد طلب کرلی۔

ایم ڈی واٹربورڈ اسداللہ خان نے واٹربورڈ کےنیپا ہائیڈرنٹ پرایمرجنسی کا نفاذ کردیاہے۔

ایم ڈی واٹربورڈکاکہناہے کہ متعدد ٹینکروں کے ذریعے سیکڑوں گیلن پانی آتشزدگی کے مقام پر پہنچایا جارہا ہے، فائربریگیڈ کو بھرپور مدد فراہم کی جائے گی، آگ پر مکمل قابو پائے جانے تک واٹربورڈ کے ہائیڈرنٹ کھلے رکھے جائیں۔

ایم ڈی واٹربورڈ کا کہناہے کہ ہائیڈرنٹس سیل افسران آتشزدگی کے مقام پر پہنچ کر پانی فراہمی کے آپریشن کی نگرانی کریں۔