گزشتہ روز لاہور کے علاقے کمہان انٹر چینج کے قریب ڈولفن پولیس کے اہلکار صفدر کی نمازِ جنازہ آج لاہور میں ادا کردی گئی۔
تفصیلات کے مطابق لاہور سمیت پنجاب کے مختلف شہروں میں پتنگ بازی کا خونی کھیل تاحال جاری ہے۔ جمعہ کے روز لاہور کے علاقے کماہاں انٹرچينج کے قريب ڈولفن پولیس کا اہلکار گلے پرڈور پھرنے سےجاں بحق ہوگيا۔
صوبائی دارلحکومت لاہور میں پتنگ بازی کا خونی کھیل نہ تھم سکا۔ پتنگ بازی کے خونی کھیل نے ایک اور جان نگل لی۔ پتنگ بازی کے خاتمے پر عملدرآمد کروانے والا ہی اس دفعہ اس خونی کھیل کا نشانہ بن گیا۔
متوفی ڈولفن اہلکار صفدر برکی کا رہائشی تھا اور ڈیوٹی ختم کرنے کے بعد گھر واپس جا رہا تھا کہ گلے پر ڈور پھرنے سے جاں بحق ہوگیا۔
پتنگ کی ڈور گلے پر پھرنے سے ایک شخص جاں بحق
متوفی اہلکار کی لاش کو اسپتال منتقل کردیا گیا ہے۔ واقعے کے بعد متعلقہ پولیس بھی موقع پر پہنچ گئی۔ پولیس کا کہنا ہے کہ ضروری کارروائی کے بعد متوفی کی لاش کو ورثہ کے حوالے کر دیا جائے گا۔
تھانہ نشتر کالونی میں ڈولفن پولیس فورس کے اہلکار محمد صفدر کے بھائی کی مدعیت میں نامعلوم افراد کے خلاف مقدمہ درج کر لیا گیا ہے۔
خیال رہے کہ پنجاب حکومت نے پتنگ بازی پر پابندی عائد کر رکھی ہے۔
ایف آئی آر کے مطابق واقعہ رات دو بج کر 15 منٹ پر اس وقت پیش آیا جب محمد صفدر رنگ روڈ کے قریب پہنچا تو نامعلوم سمت سے آنے والی ڈور گلے پر پھرنے سے موت واقع ہوئی۔
پولیس کے مطابق محمد صفدر کو فوری طور پر جنرل ہسپتال پہنچایا گیا لیکن ڈولفن فورس کا اہلکار زخموں کی تاب نہ لاسکا اور موقع پر ہی ہلاک ہو گیا تھا۔
تھانہ نشتر کالونی کے اے ایس آئی محمد اکرم کے مطابق ڈولفن اہلکار محمد صفدر کا پوسٹ مارٹم مکمل کر لیا گیا ہے جس کے بعد جسد خاکی کو ڈولفن ہیڈ کواٹر والٹن لے جایا جائے گا جہاں ان کی نماز جنازہ ادا کی جائے گی۔
دوسری جانب وزیر اعلیٰ پنجاب عثمان بزدار نے واقعہ کا نوٹس لیتے ہوئے سی سی پی او لاہور سے واقعے کی رپورٹ طلب کر لی ہے۔
وزیراعلیٰ پنجاب نے ہلاک ہونے والے ڈولفن اہلکار کے لواحقین سے دلی ہمدردی اور تعزیت کا اظہار کرتے ہوئے غفلت برتنے والے ذمہ داروں کے خلاف سخت قانونی کارروائی کا حکم دیا ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News