وزیراعظم عمران خان  نے اتحادیوں کے لئے بنائی  گئی کمیٹیوں کو فوری رابطوں کی ہدایت کردی ہے۔

تفصیلات کے مطابق وزیراعظم عمران خان کی زیرصدارت بنی گالہ کے ہنگامی اجلاس میں اہم فیصلے  کئے گئے، اجلاس میں ملکی معاشی صورتحال پر بھی بریفنگ دی گئی اور یوم یکجہتی کشمیر کے انتظامات کا بھی بھرپور جائزہ لیا گیا۔

وزیراعظم  نے  امریکی ٹریول ایڈوائزری میں تبدیلی پر مبارکباد دی اور کہا کہ اس تمام تر بہتری کا کریڈٹ سیکیورٹی فورسز اور قوم کو جاتا ہے کیونکہ بہادر سیکیورٹی فورسز نے اپنی قربانیوں سے ملک میں امن قائم کیا ہے۔

اس موقع پر عمران خان کا کہنا تھا کہ وہ دن دور نہیں جب پاکستان دنیا میں سیاحت کا سب سے بڑا مرکز ہوگا۔

وزیراعظم نے اتحادی جماعتوں کیساتھ رابطہ رکھنے کیلئے کمیٹیاں تشکیل دیدیں

وزیراعظم  نے دنیا میں  بڑھتے جان لیوا کرونا وائرس  پر تشویش کا اظہار کیا اور عمران خان کو کرونا وائرس سے متعلق اقدامات پر بریفنگ بھی دی گئی۔

وزیراعظم عمران خان نے کرونا وائرس کی روک تھام کے لئے مزید تیز اقدامات  کرنے کی ہدایت کی ہے۔

عمران خان کا کہنا تھا کہ اتحادیوں سے کیےگئے وعدےپورےکیےجائیں گے جبکہ اجلاس میں اتحادیوں سے رابطے تیز کرنے کا فیصلہ کیا گیا ہے۔

ذرائع کے مطابق  وزیراعظم نے مہنگائی پر بریفنگ لینے کے بعد مہنگائی کو کم کرنے کے لیے اقدامات کی ہدایت بھی کی ہے۔

واضح رہے کہ اس سے قبل ایک اجلاس میں وزیراعظم عمران خان نے حکومت کی اتحادی جماعتوں سے رابطے رکھنے کے لئے مختلف کمیٹیاں تشکیل دی تھیں۔

پاکستان تحریک انصاف کے اتحادی جماعتوں کے ساتھ رابطوں کے بارے میں تفصیلی تبادلہ خیال ہوا جبکہ خصوصا پاکستان تحریک انصاف کی اپنے اتحادیوں سے رابطوں کے عمل پر غور ہوا۔

وزیراعظم نے اس بات پر زور دیا کہ رابطوں کا یہ عمل مزید مضبوط اور باضابطہ ہونا چاہئے تاکہ تمام حکومتی اتحادیوں کے درمیان رابطوں میں کسی قسم کی کمی نہ رہے۔