وزیر اعظم عمران خان  نے کہا ہے کہ ہم بھارت کو نازی ازم کی وارث  جماعت آر ایس ایس کے ہاتھوں میں گرتا دیکھ رہے ہیں۔

سماجی رابطے کی ویب سائٹ ٹوئیٹر پر جاری بیان میں وزیر عمران خان نے کہا کہ آج ہم جوہری صلاحیت کی حامل 1 ارب سے زائد انسانوں پر مشتمل ریاست بھارت کو نازی ازم کی وارث  جماعت آر ایس ایس کے ہاتھوں میں گرتا دیکھ رہے ہیں۔

آج ہم جوہری صلاحیت کی حامل 1 ارب سے زائد انسانوں پر مشتمل ریاست بھارت کو نازی ازم کی وارث آر ایس ایس کے ہاتھوں میں گرتا دیکھ رہے ہیں۔ نفرت کی بنیاد پر نسل پرستانہ نظریات کا حامل گروہ جب بھی غالب آتا ہے، قتل و غارت گری اور خونریزی کے دروازے کھل جاتے ہیں۔

— Imran Khan (@ImranKhanPTI) February 26, 2020

وزیر اعظم نے کہا  کہ نفرت کی بنیاد پر نسل پرستانہ نظریات کا حامل گروہ جب بھی غالب آتا ہے تو قتل و غارت گری اور خونریزی کے دروازے کھل جاتے ہیں۔

عمران خان نے کہا کہ میں نے گذشتہ برس اقوام متحدہ کی جنرل اسمبلی سے اپنے خطاب میں پیش گوئی کی تھی کہ ایک مرتبہ جن بوتل سے نکل آیا تو خونریزی میں شدت آئے گی۔

گزشتہ برس اقوام متحدہ کی جنرل اسمبلی سے اپنے خطاب میں میں نے پیش گوئی کی تھی کہ ایک مرتبہ جن بوتل سے نکل آیا تو خونریزی میں شدت آئے گی۔ کشمیر آغاز تھا، آج ہندوستان میں مقیم 200 ملین (20 کروڑ) مسلمان نشانے پر ہیں۔ عالمی برادری کیلئے کچھ کرنے کا بلاشبہ یہی وقت ہے۔

— Imran Khan (@ImranKhanPTI) February 26, 2020

انہوں نے کہا کہ کشمیر آغاز تھا، آج ہندوستان میں مقیم 20 کروڑ  مسلمان نشانے پر ہیں۔ عالمی برادری  کے لیے کچھ کرنے کا بلاشبہ یہی درست وقت ہے۔

وزیر اعظم نے کہا کہ پاکستان میں اگر کسی نے بھی غیر مسلم شہریوں پر ہاتھ اٹھانے کی کوشش کی یا کسی عبادت گاہ کی جانب بری نظر سے دیکھا تو نہایت سختی سے پیش آئیں گے۔ ہماری اقلیتیں اس ملک کی برابر کی شہری ہیں۔

واضح رہے کہ بھارت کے مختلف شہروں میں متنازع شہریت قانون کے خلاف شدید مظاہرے جاری ہیں ۔

دو روز قبل دارالحکومت نئی دہلی میں اُس وقت فسادات پھوٹ پڑے جب شمال مشرقی علاقوں میں متنازع شہریت کے قانون کے خلاف احتجاج کرنے والوں پر ہندو انتہا پسندوں نے حملے کیے تھے۔

ہندو توانظریے کے حامیوں نے مسجد پر حملہ کیا اور مسجد کی حرمت کو پامال کردیا۔سوشل میڈیا پر وائرل ہونے والی  ویڈیوز میں دیکھا جاسکتا ہے کہ ہندو بلوائیوں نے مینار پر چڑھ کر ہلال کے نشان کو اکھاڑنے کوشش کی ۔

ان حملوں میں  کم از کم 20 افراد جاں بحق جبکہ 200سے زائد زخمی ہوچکے ہیں جس پر مقامی حکومت نے علاقے میں دفعہ 144 نافذ بھی کردی ہے۔