مسلم لیگ ن کے رہنما احسن اقبال نے کہا ہے کہ حکومت اور نیب نے مجھے بدنیتی سے ہدف بنایا ہوا ہے، میرے خلاف ایک ایسا ریفرنس گوجرانولہ سے ریفر ہوا ہے جس میں نہ ملزم ہوں نہ مطلوب ہوں ، یہ بدنیتی پر مبنی ہے اور اس کا مقصد مسلم لیگ ن کو ہراساں کرنا ہے، میری فیملی کو ہراساں کیاجارہا ہےجس کا مقصد یہ ہے ہم اپنے موقف سے پیچھے ہٹیں۔

تفصیلات کے مطابق نارووال اسپورٹس سٹی کیس کی سماعت کے بعد میڈیا سے گفتگوکرت ےہوئے مسلم لیگ ن کے رہنما کا کہنا ہے کہ مجھے اچھے کام کرنے کی سزا دی جا رہی ہے، ہماری حاضریاں لگوائی جا رہی ہے، مافیا آزاد پھررہا ہے۔

انہوں نے کہا کہ حکومت اور نیب نے مجھے بدنیتی سے ہدف بنایا ہوا ہے ،گوجرانوالہ سے ایسی انکوائری منتقل کی گئی جس میں نہ میں ملزم ہوں نہ میں مطلوب ہوں جبکہ میرے بھائی کو میٹرو منصوبے کے کیس میں پھنسایا جا رہا ہے ۔

احسن اقبال نے کہا کہ نیب ثابت کردیں انیس سو ترانوے کے مقابلے میں میرے اثاثے بڑھے تو میں مجرم ہوں ،ہم نے اپنے گھر اور اثاثے جلا کر سیاست کی ہے قوم کی خدمت کی ہے،وہ لوگ جنہوں نے ملک کو بنایا وہ نیب کے چکر کاٹ رہے ہیں۔

اس سے قبل احتساب عدالت میں لیگی رہنما احسن اقبال کے خلاف نارووال اسپورٹس سٹی کیس کی سماعت جج محمد بشیرنے کی،اس موقع پر روسٹرم پر آکر احسن اقبال نے عدالت کو بتایا کہ گزشتہ اٹھارہ ماہ کے دوران نارووال سٹی کو اجاڑ دیا گیا،یہ سب وزیراعظم کی ہدایت پر کیا گیا ہے۔

جس پر جج احتساب عدالت نے کہا کہ آپ نے جو کچھ کہنا ہے تحریری طور پر وکیل کے ذریعے کہیں،بعد ازاں احتساب عدالت نے نیب کو ایک ماہ میں ریفرنس دائر کرنے کی ہدایت کر تے ہوئے کیس کی سماعت 26 مارچ تک ملتوی کردی۔