سپریم کورٹ نے سرکلر ریلوے کے پلان پر فوری کام شروع کرنے کی ہدایت کرتے ہوئےسندھ حکومت کوریلوے کومکمل سہولیات فراہم کرنےکے احکامات جاری کردیے۔

تفصیلات کے مطابق سپریم کورٹ کراچی رجسٹری میں شہر میں تجاوزات اورسرکلر ریلوے کی بحالی کے کیس سے متعلق سماعت کرتے ہوئے کراچی سرکلر ریلوے پلان پر فوری کام شروع کرنے کا حکم دے دیا۔

چیف جسٹس گلزاراحمد کی سربراہی میں تین رکنی لارجربنچ نےکیس کی سماعت کی، لارجر بینچ میں جسٹس فیصل عرب اور جسٹس سجاد علی شاہ بھی شامل ہیں۔

  کمرہ عدالت میں سماعت کے دوران عدالت نے ریمارکس دیتے ہوئے کہا کہ سرکلر ریلوے ڈبل ٹریک پر فوری کام شروع کیا جائے، منصوبے کی منظوری اور دیگر امور کو فوری حل کیا جائے۔

عدالت نے حکم جاری کیا کہ سندھ حکومت ریلوے کو مکمل سہولیات فراہم کرے، اس سلسلے میں سیکرٹری ریلوے کو سندھ حکومت سے تعاون کرنے کی بھی ہدایت دی گئی ہے۔

عدالت نےسماعت کے دوران سیکرٹری ریلوے اور ایڈووکیٹ جنرل سندھ کی جانب سے پیش کیے گئے دلائل  پر برہمی کا اظہارکیا جس میں کہا گیا کہ منصوبہ شروع کرنے کیلئے پیسے نہیں ہیں، کام تب شروع ہوگا جب پیسے ہوں گے، جس پر عدالت نے ریمارکس دیے کہ پیسے تو چینی خود دیں گے۔

چیف جسٹس گلزار احمد نےتنبیہہ کرتے ہوئے کہا کہ اگرسرکلر ریلوے 6 ماہ میں نہیں چلائی تو وزیراعظم ، وزیراعلیٰ سندھ کو توہین عدالت کا نوٹس بھیجیں گے۔

سماعت کے دوران عدالت نےچین سے مشاورت کے لیے 2 ہفتوں کی مہلت دیتے ہوئے منصوبے پر تمام کارروائی 5 ماہ میں مکمل کرنے کی ہدایت کردی۔

واضح رہے کہ گزشتہ سماعت پرعدالت نےچیف سیکرٹری سندھ سمیت دیگر فریقین کو نوٹس جاری کیے تھے، سپریم کورٹ نےسندھ حکومت، وفاقی حکومت، کنٹونمنٹ کے نمائندگان سے عملدرآمد رپورٹ طلب کی تھے۔

علاوہ ازیں سپریم کورٹ نے سرکلر ریلوے سے تجاوزات کے خاتمے سے متعلق رپورٹ بھی طلب کر رکھی تھی۔