ملک میں کرونا وائرس کے کیسز کی تصدیق کے بعد شہر بھر کے میڈیکل اسٹورزمیں ماسک کی قلت پیدا ہوگئی۔

تفصیلات کے مطابق گزشتہ روز کراچی میں ایران سے آنے والے ایک شہری میں کرونا وائرس کی تصدیق ہوئی ہے جس کے بعد وفاقی اور صوبائی حکومت الرٹ ہوگئی ہے۔ اس سلسلے میں کراچی میں متعدد مقامات پر آئسولیشن سینٹر بھی قائم کر دیئے گئے ہیں۔

دوسری جانب کرونا وائرس کی تصدیق ہونے کے بعد کراچی کے میڈیکل اسٹورز سے ماسک غائب ہوگئے ہیں۔

کارچی کے میڈیکل اسٹورکے مالکان نے بتایا کہ پہلے عام ماسک کا ڈبہ 300 سے 400 روپے تک کا تھا جس کی قیمت اب ہزار روپے سے بھی بڑھ گئی ہے۔

دکانداروں کا کہنا ہے کہ این 95 ماسک کی قیمتیں بڑھا دی گئی ہیں، قیمتیں بڑھنےکے باوجود بھی مارکیٹ میں دستیاب نہیں ہے۔

پاکستان میں ماسک کی شدید قلت، بیرون ملک برآمد

حکومت پاکستان کی جانب سے ماسک کی برآمد پرپابندی عائد کی گئی تھی لیکن اس کے باوجود چین کو 10 ہزار این 95 اور 36 لاکھ 13 ہزار عام ماسک برآمد کیے گئے۔

پابندی کے باوجود 6 کمپنیوں کو ماسک کی برآمد کی خصوصی اجازت دی گئی جس کے بعد ملک میں ماسک کی کمی ہوگئی ہے اور قیمتوں میں بھی کئی گنا اضافہ ہو گیا۔

حکام وزارت صحت کا اس حوالے سے مؤقف ہے کہ پاکستان میں ماسک کی مصنوعی قلت ذخیرہ اندوزوں نے کر رکھی ہے۔