کورونا وائرس کے پھیلاؤ کے تناظر میں‌ سندھ بھر میں لاک ڈاؤن کا اعلان کردیا گیا ہے۔

وزیراعلیٰ سندھ  مراد علی شاہ نے قانون نافذ کرنے والے حکام کو بھی اعتماد میں لےلیا۔

تفصیلات کے مطابق سندھ میں لاک ڈاؤن کے اعلان کے بعد شہریوں کے بلا ضرورت گھروں سے نکلنے پر پابندی ہوگی،اشیائے خورو نوش کی دکانیں کھلی رہیں گی، کریانہ اور میڈیکل اسٹور بھی بند نہیں ہوں گے۔

وزیر اعلیٰ کا کہنا ہے کہ لاک ڈاؤن پورے صوبے میں ہوگا،  کنٹرول رومز آئی جی پولیس اور ڈی جی رینجرز کے دفاتر میں قائم کیے جائیں گے۔

 وزیراعلیٰ سندھ کا کہنا ہے کہ تمام سروسز ، فون ، یوٹیلیٹی ، ٹی وی کیبل ، فون، موبائل سروسز بلا تعطل جاری رکھی جائیں گی، حیسکو، سیپکو، واسا ، کے ڈبلیو ایس بی، ایس ایس جی سی اور دیگر اداروں کو اپنی سروسز زبردست طریقے سے دینی ہیں۔

 وزیراعلیٰ سندھ نے مزید کہا کہ اے ٹی ایمز کھلے رہیں گے، بینکس اپنا ضروری اسٹاف مہیا کرے گا۔

واضح رہے کہ لاک ڈاؤن کا اطلاق اتوار کی رات(آج) 12 بجے سے کیا جا سکتا ہے۔

وزیرِ اعلیٰ سندھ مراد علی شاہ کی صدارت میں آج اہم اجلاس ہوا جس میں صوبائی وزراء، ڈاکٹر عذرا پیچوہو، سعید غنی، مرتضیٰ وہاب، چیف سیکریٹری سندھ، ڈی جی رینجرز سندھ، آئی جی سندھ، کور ہیڈکوراٹر کے بریگیڈیئر وسیم، اے جی سندھ، سیکریٹری داخلہ، ایڈیشنل آئی جی کراچی، تمام ڈویژنل کمشنرز اور آر پی اوز ویڈیو لنک پر شریک ہوئے۔

اجلاس سے خطاب کرتے ہوئے وزیرِ اعلیٰ سندھ نے کہا کہ ہم بڑے فیصلے کرنے جا رہے ہیں، عوام کی صحت کی خاطر ہر وہ فیصلہ کریں گے جو ضروری ہے۔