کورونا وائرس کے پھیلاؤ کے سبب حکومت پاکستان نے فضائی آپریشن 2 ہفتوں کے لئے بند کردیا ۔

تفصیلات کے مطابق حکومت نے ملک میں کورونا وائرس کے پھیلاؤ کو روکنے کے لیے بین الاقوامی فضائی آپریشن کو 2 ہفتوں کے لئے بند  کردیا ہے۔

ترجمان ایوی ایشن ڈویژن عبدالستار کھوکھر کا کہنا ہے  فضائی آپریشن بند کرنے کا فیصلہ وزیر اعظم کی مشاورت کے بعد کیا گیا ہے جس کی وزیر اعظم نے منظوری دے دی ہے۔

ترجمان ایوی ایشن ڈویژن کا کہنا ہے کہ کورونا وائرس کے پیش نظر حکومت نے 5 اپریل تک پاکستان آنے والی تمام ایئر لائنز کی پروازوں پر پابندی لگا دی ہے۔ فیصلے پر اطلاق آج رات 8بجے سے شروع ہوگا۔

عبدالستار کھوکھر کورونا وائرس کے پیش نظر حکومت نے تمام آپشنز پر غور کرنے کے بعد یہ فیصلہ کیا ہے۔سفارتکار اور اسپیشل کارگو ایئرکرافٹس  اس پابندی سے مستثنیٰ  ہوں گے۔

پی آئی اے کا بین الاقوامی پروازیں بند کرنے کا فیصلہ

وزیر اعظم  نے وزیر ہوا بازی غلام سرور خان کو ہدایت کی ہے کہ  واپسی کے  لیے نکلے ہوئے پاکستانی مسافروں کے وطن واپس پہنچنے تک فضائی حدود کھلی رکھی جائیں اور تمام ایئر لائنز کو مطلع کیا جائے کہ پاکستان کے  لیےمزید پروازیں روانہ نہ کریں ۔

اس سے قبل  ایوی ایشن ڈویژن کی جانب سے وزیر اعظم عمران خان کو  بیرون ملک پھنسے پاکستانیوں کی وطن واپسی  کے معاملے پر مختلف تجاویز پیش کی گئی تھیں۔

پہلی تجویز یہ تھی کہ  اگر مسافروں کو کورونا فری سرٹیفیکیٹ نہیں ملتا تو پھر  ملک میں داخل ہوتے ہی 14 روز کے لئے قرنطینہ سینٹر میں منتقل کردیا جائے ۔

دوسری تجویز   یہ تھی کہ اگر مسافروں کے  لیے قرنطینہ سینٹر میں 14 دن گزارنا مشکل ہو  اور  اگر مرض پھیلنے کا خدشہ ہے تو پھر پاکستان سے تمام فضائی آپریشن بند کردیا جائے ۔