رانا ثنااللہ کاکہناہے کہ شہباز شریف مارچ کے آخر تک پاکستان آجائیں گے، شہباز شریف واپس آکر اپوزیشن لیڈر کا کردار نبھائیں گے۔

رانا ثنااللہ نےمیڈیا سے بات کی ہے جس میں انہوں نے کہا کہ آٹا اور چینی چوروں کے حساب کیلئے شہباز شریف آئیں گے،امید ہے مارچ میں ہی نواز شریف کا پروسیجر ہو، نااہل ٹیم کوکسی چیز کی فکر نہیں،صرف نواز شریف کی فکر ہے۔

رانا ثنا نے کہا کہ پوری قوم مہنگائی کی چکی میں پس رہی ہے،ہر چیزعوام کی پہنچ سے دور ہے، کوشش ہے مڈ ٹرم الیکشن رواں سال ہوں،2020 مڈ ٹرم الیکشن کا سال ہوگا۔

عورت مارچ سے متعلق انہوں نےکہا کہ اسلام نے سب سے پہلے عورت کوحقوق دیے،عورت مارچ بالکل ہونا چاہیئے۔

ان کا کہناتھا کہ ’میرا جسم میری مرضی‘ نعرہ بالکل درست ہے،نعرے کوغلط معنوں میں لیا جارہا ہے۔

اس سے قبل مسلم لیگ ن کے رہنما رانا ثنا اللہ کیخلاف منشیات اسمگلنگ کیس کی سماعت کے دوران فرد جرم عائد نہ ہوسکی۔

 انسداد منشیات کی خصوصی عدالت کے جج شاکر حسن نے کیس کی سماعت کی، سابق وزیر قانون رانا ثنااللہ کے خلاف فرد جرم عائد نہ ہوسکی اورعدالت نے کیس پر سماعت 28 مارچ تک ملتوی کردی۔

آئندہ سماعت پرعدالت نے گواہوں کے بیانات کی درخواست پر فریقین کے وکلا کو بحث کے لئے طلب کرلیا۔

عدالت میں رانا ثنااللہ نے گواہوں کے بیانات کی کاپی فراہم کرنے کی درخواست دائر کی ہے۔ وکیل فرہاد علی شاہ کاکہاہےکہ 50 سےزائد نئے لوگوں کو شامل تفتیش کیا گیا۔

عدالت میں رانا ثنااللہ کے شریک ملزم عثمان فاروق نے نئے وکیل کا وکالت نامہ جمع کروا دیا۔

فاضل جج نے سماعت کے دوران وکلاسے استفسارکیاکہ کیا ملزمان پر فرد جرم عائد کرنی ہے۔جس پر وکلا نےعدالت سے استدعا کی کہ ہم نے تمام کیس پڑھنا ہے اس کے بعد فرد جرم عائد کی جائے۔

اے این ایف پراسیکیوٹرنے کہاکہ ملزمان کے وکلا فرد جرم عائد کرنے کے حوالے سے عدالتی وقت ضائع کررہے ہیں،فرد جرم عائد ہونی ہےکسی کو اعتراض نہیں ہونا چاہیئے،پچھلی تاریخ پر یہ طے تھا کہ آج فرد جرم لگے گی،5ملزمان ہیں کوئی نہ کوئی تاریخ مانگتا رہے گا،فرد جرم عائد ہو اور دودھ کا دودھ پانی کا پانی ہو۔

کمرہ عدالت میں وکیل فرہاد علی نے کہا کہ کچھ لوگوں کو بلایا لیکن ہمیں انکے بیان کی کاپی نہیں دی۔ ج سکے بعد عدالت نے کیس 28مارچ تک ملتوی کرتے ہوئے ریمارکس دیے کہ اس کے بعد کوئی تاریخ نہیں دی جائے گی