وزیر اعظم عمران خان نے ویسٹ انڈیز سے تعلق رکھنے والے پاکستان سپر لیگ کے سب سے مقبول کھلاڑی ڈیرن  سیمی کو پاکستان کی اعزازی شہریت ملنے پر مبارکباد پیش کی۔

تفصیلات کے مطابق پاکستان سپر لیگ کی فرنچائز ٹیم پشاور زلمی  کے چیئر مین جاوید آفریدی، کپتان ڈیرن سیمی  ، ہیڈکوچ محمد اکرم اور بیٹنگ مینٹور ہاشم آملہ نے وزیر اعظم سے ملاقات کی۔

ملاقات میں وزیر اعظم عمران خان نے پاکستان کی اعزازی شہریت ملنے پر ڈیرن سیمی کو گرمجوشی سے مبارکباد دیتے ہوئے کہا کہ اب آپ ہمارے شہری بھی ہیں، پاکستان میں بین الاقوامی  کرکٹ کی بحالی  میں آپ کا کردار ہمیشہ یاد رکھا جائے گا۔

عمران خان نے مزید کہا کہ جاوید آفریدی نے ڈیرن سیمی کے ساتھ مل کر پاکستان کرکٹ کی خدمت کی ہے اور ہمیشہ ڈیرن سیمی  کی پاکستان میں کرکٹ کی خدمات کو نمایاں  کرنے اور سراہنے پر زور دیا ہے۔

وزیر اعظم نے جنوبی افریقا کے لیجنڈ بیٹسمین اور  پشاور زلمی کے مینٹور ہاشم آملہ کو بھی  پاکستان میں خوش آمدید کہا۔

انہوں نے کہا خوشی ہے کہ پورا پی ایس ایل پاکستان میں ہورہا ہے اور لوگ خوش ہیں ۔پی ایس ایل کے تمام میچز میں اسٹیڈیم بھرے ہوئے ہیں ، یہ پوری دنیا کو پاکستان کا مثبت پیغام ہے۔

اس موقع پر جاوید آفریدی کا کہنا تھا کہ وزیر اعظم عمران خان نے پاکستان میں انٹرنیشنل کرکٹ کی بحالی میں پشاور زلمی اور ڈیرن سیمی کے کردار کو  ہمیشہ سراہا ہے۔