وزیراعظم عمران خان کی زیرصدارت کرونا سے متعلق نیشنل کوآرڈینیشن کمیٹی کا اجلاس ہوا جس میں ملک بھر میں کرونا وائرس سے نمٹنے کے اقدامات کا جائزہ لیا گیا۔

تفصیلات کے مطابق اجلاس میں وزیر مذہبی امور نورالحق قادری، وزیر داخلہ اعجاز شاہ، مشیر خزانہ عبدالحفیظ شیخ شریک ہوئے۔

اجلاس میں معاون خصوصی فردوس عاشق اعوان، سید ذوالفقار عباس بخاری، ڈاکٹرمعید یوسف اور دیگر حکام شریک ہوئے۔

ڈاکٹر ظفر مرزا نے وزیر اعظم کو وفاقی حکومت کے حفاظتی اقدامات اور قومی صورتحال کے بارے میں بریف کیا۔

اجلاس میں چاروں صوبوں کے وزرائے اعلیٰ نے وزیراعظم کو اقدامات پر بریفنگ دی، ملک بھر کے ایئرپورٹس اور بندرگاہوں پر حفاظتی اقدامات کا جائزہ لیا گیا۔

اجلاس میں قومی سلامتی کمیٹی کے فیصلوں پرعملدرآمد یقینی بنانے پر زور دیا گیا، ملک بھر میں عوامی اجتماعات پر پابندی کے حوالے سے اقدامات کےبارے میں صوبائی حکومتوں نے آگاہ کیا۔

سینیما گھروں، شادی ہالزپر پابندی، اسپتالوں میں انتظامات سے متعلق بھی آگاہ کیا گیا، سرحدیں بند کرنے سے پیدا ہونے والی صورتحال سے نمٹنے کے اقدامات پر بھی تجاویز پیش کی گئیں۔