وزیراعظم عمران خان نے کہا ہے کہ 2020 نوکریاں  دینے اور شرح نمو بڑھانےکا سال ہے۔

تفصیلات کے مطابق کم لاگت گھروں کی تعمیر کے لیے بلاسود قرضوں کی فراہمی کی تقریب سے خطاب کرتے ہوئے  وزیراعظم عمران خان کا کہنا تھا کہ اعتماد ہی خیراتی ادارے کی کامیابی کا رازہے، عوام کو اعتماد ہوجائے کہ ان کا پیسہ صحیح جگہ پرخرچ ہوگا تو وہ پیسہ دیتے ہیں۔

انہوں نے بتایا کہ شوکت خانم کینسر اسپتال بنارہا تھا تو بتایا گیا کہ 70 کروڑ روپے لاگت آئے گی، اس وقت یہ بہت مشکل تھا لیکن پھر لوگوں نے اعتماد کیا اور اب ہرسال عوام  شوکت خانم کے لیے  بڑھ چڑھ کرحصہ دیتے ہیں، خیراتی ادارے کی طرف سے کم لاگت گھروں کی فراہمی بڑااقدام ہے، لوگوں کو اخوت پروگرام پراعتماد ہے۔

خیبرپختونخواہ کی وزارت میں بڑی تبدیلیاں

ان کا کہنا تھا کہ  کم تنخواہ دار طبقے کو چھت کی فراہمی حکومت کی ترجیح ہے، کمزور طبقے کو سہارا دینے کا تصور ریاست مدینہ سے لیا، صحت انصاف کارڈ ملک میں ایک انقلاب ہے، کے پی حکومت نے تمام غریبوں کو صحت کارڈ دینے کا فیصلہ کیا ہے جبکہ پنجاب میں 50 لاکھ  ہیلتھ کارڈ تقسیم کیے جاچکے۔

انہوں نے مزید کہا کہ غریب طبقے کو وسائل کی فراہمی کے لیے اقدامات کررہے ہیں، اسلام آباد میں بلیو ایریا پروجیکٹ لانچ کر دیا گیا ہے جبکہ پروجیکٹ سے ملنے والا پیسہ غریبوں کو گھروں کی فراہمی  پرخرچ ہوگا، 2020ء لوگوں کو نوکریاں دینے اور شرح نمو بڑھانےکا سال ہوگا۔

عمران خان کا کہنا تھا کہ ہاؤسنگ کے 3 بڑے پروجیکٹ شروع کر دیے ہیں،گھروں کی تعمیرکے منصوبوں سے ملک میں روزگار کے مواقع پیدا ہوں گے، جیسے پیسہ آئےگا غریب طبقےکو اٹھانےکی کوشش کریں گے۔

وزیراعظم پاکستان نے مزید کہا کہ بڑے شہروں میں کچی بستیوں والوں کے لیے فیلٹس بنائیں گے، کم لاگت ہاؤسنگ منصوبوں کو جلد اوپر اٹھانا ہے، 2020 لوگوں کو روزگار اور نوکریاں دینے کا سال ہوگا۔