وزیر اعظم عمران خان نے کورونا وائرس کے باعث پیدا شدہ ہنگامی صورتحال کو مد نظر رکھتے ہوئے تمام وفاقی وزراء کی چھٹیاں منسوخ  کردیں۔

قومی رابطہ کمیٹی  کے اجلاس کے بعد وزیر اعظم عمران خان   اور چیئر مین این ڈی ایم اے نے حکومتی ٹیم کے ہمراہ  سینئر صحافیوں کو اجلاس سے متعلق بریفنگ دی۔

صحافیوں کو بریفنگ دیتے ہوئے وزیر اعظم کا کہنا تھا کہ  کورونا وائرس کی صورت حال کی یومیہ بنیاد پر جائزہ لیا جائے گا، تمام وفاقی وزرا ء ہر وقت اسلام آباد میں  میسر ہوں گے، کوئی چھٹی نہیں  کرے گا۔

وزیر اعظم  کا کہنا ہے کہ  احتیاط  کیے بغیر کورونا سے نمٹنے میں  بہت مشکلات  پیدا ہوسکتی ہیں۔کوئی یہ نہیں کہہ سکتا کے 2ہفتے کے بعد کیا صورتحال ہوگی۔

کورونا سے ڈرنا نہیں لڑنا ہے، وزیر اعظم

عمران خان  نے کہا کہ ہفتے میں دوبار عوام کو کورونا وائرس صورت حال سے آگاہ کروں گا۔ عوام سے کچھ نہیں چھپائیں گے۔

انہوں نے کہا کہ   چین نے کورونا وائرس کے خلاف بہتر اقدامات کیے ہیں، چین کے اقدامات دیکھتے ہوئے ہم بھی فیصلے کریں گے،جنوری کے بعد  سے چین کی حکومت سے مسلسل رابطے میں رہے ہیں۔

وزیراعظم  نے کہا کہ  چین نے اس وباء پر قابو پالیا ہے اور اب وہ پاکستان کی مدد بھی کررہا ہے۔ پاکستان میں کورونا کا کوئی بھی کیس چین سے منتقل نہیں ہوا۔

عمران خان کا کہنا تھا کہ ہمیں چین میں پھنسے پاکستانی طالبعلموں کا احساس ہے تاہم وباء کے باعث انہیں وطن واپس لانے سے گریز کیا۔

انہوں نے کہا کہ  کورونا سے بچنے کے لیے سماجی فیصلہ ضروری ہے۔پاکستان میں وبا ءپھیلی تو 4سے 5فیصد  لوگوں کوانتہائی نگہداشت کی ضرورت پڑےگی  اور اتنے مریضوں کو انتہائی نگہداشت کی سہولت فراہم کرنامشکل ہو گا۔

کورونا وائرس سے اموات، اٹلی نے چین کو پیچھے چھوڑدیا

وزیر  اعظم نےمزید کہا کہ تفتان سے متعلق بلیم گیم چل پڑی ہے جو افسوس ناک ہے۔ وزیراعلیٰ بلوچستان پر انگلیاں اٹھائی گئیں جس پر افسوس ہوا،ہم سب کو مل کر کورونا وائرس کا مقابلہ کرنا ہوگا۔

عمران خان  کا کہنا تھا کہ کورونا وائرس سے  جنگ قوم جیت سکتی ہے، حکومت نہیں۔  امید ہے درجہ حرارت میں اضافے سے وائرس کے پھیلاوَ میں کمی آئے گی۔

انہوں نے کہا کہ  سندھ حکومت نے  کراچی میں لاک ڈاوَن کردیا ہے۔ ملک میں لاک ڈاوَن سے دیہاڑی دار مزدور  بے روزگار ہوجائیں گے۔ ہم نہیں چاہتے کہ لاک ڈاوَن کے باعث لو گ بھوک سے مر جائیں۔

ایران پر پابندیوں کے حوالے سے ایک مرتبہ پھر وزیر اعظم عالمی برادری سے مطالبہ کیا کہ ایران پر عائد پابندیاں ہٹائی جائیں۔ایران میں طبی سہولیات کے فقدان کے باعث کورونا کیسز میں اضافہ ہوا ہے۔