سندھ حکومت نے لاک ڈائون کے دوران مستحق افراد میں راشن تقسیم سے متعلق نیا ایس او پی بنالیا ہے۔

سندھ حکومت نے راشن تقسیم سے متعلق  نیا طریقہ کار وضع کردیا ، مستحق افراد میں راشن تقسیم کرنے والے فلاحی ادارے سندھ حکومت کی موبائل ایپلیکیشن سندھ ریلیف انیشٹو میں رجسٹرڈ کرانا ہوگا۔

محکمہ داخلہ سندھ نے صوبے بھر کے کمشنرز، ڈی آئی جیز کو عمل درآمد کے لیے خط لکھ دیا جس کا نوٹیفکیشن بھی جاری کر دیا گیا ہے ۔

نوٹیفکیشن میں کہا گیا کہ مستحق افراد میں راشن صبح 4 سے سات بجے تک گھروں پر تقسیم کیا جائے گا اور اسکی فہرست اعلی’ حکام کو دی جائیگی۔

راشن کیسے تقسیم ہوں گے؟ پلان تیار ہوگیا 

محکمہ داخلہ سندھ کے ترجمان کا کہنا ہے کہ راشن کی تقسیم کے دوران امن و امان کی صورتحال بگڑنے پر راشن تقیسم فوری روک دی جائے جبکہ راشن کی تقسیم کے دوران رش نہ کیا جائے۔

ترجمان محکمہ داخلہ سندھ کا یہ بھی کہناہے کہ راشن کی تقسیم کے دوران مستحق افراد کی عزت نفس کا مکمل خیال رکھا جائے جبکہ کم سے کم 15 زیادہ سے زیادہ 30دن کا راشن مستحقین کو دیا کو دیا جائے۔

محکمہ داخلہ سندھ کے ترجمان نے مزید کہا کہ راشن میں آٹا کھانے پکانے کا تیل، دالیں, چینی سمیت 17 اشیا موجود ہونگی۔

 یاد رہے اس سے قبل سندھ حکومت کی جانب سے غریب اور یومیہ اجرت کمانے والے افراد کے لئے راشن کی فراہمی کے لئے 25 لاکھ سے زائد آبادی کے شہر حیدرآباد کے لئے 10 ہزار راشن بیگ کا انتظام کیا گیا تھا۔

 ضلعی انتظامیہ کی جانب سے مقامی تاجر کو ایک کروڑ 70 لاکھ میں راشن بیگ تیار کرنے کا ٹھیکہ دیا گیا تھا جبکہ حکومت کی جانب سے 10 ہزار سے زائد راشن بیگز حیدرآباد کی چاروں تحصیلوں میں تقسیم کرنے کا طریقہ کار طے کر لیا گیا تھا۔