وزیراعظم عمران خان سے معاون خصوصی عثمان ڈار کی ملاقات ہوئی ، جس میں کورونا ریلیف ٹائیگر فورس کے آپریشنل معاملات پر مشاورت کی گئی ۔

اس موقع پر معاون خصوصی عثمان ڈار نے وزیراعظم عمران خان کو ٹائیگر فورس کی تازہ ترین رپورٹ پیش کی، جس پر وزیراعظم نے رپورٹ پر اظہار اطمینان کیا جبکہ فورس کو صوبائی سطح پر فوری متحرک کرنے کی ہدایت بھی کی ۔

ملاقات کے دوران ٹائیگر فورس کی لائیو اپ ڈیٹ کو پبلک کرنے کا فیصلہ کیا گیا اور وزیراعظم کی ہدایت پر ٹائیگر فورس کا پورٹل کووڈ 19 کی سرکاری ویب سائیٹ سے لنک کر دیا گیا۔

اس موقع پر معاون خصوصی عثمان ڈار نے کہا کہ ٹائیگر فورس میں رجسٹرڈ نوجوانوں کی تعداد 7 لاکھ 39 ہزار سے تجاوز کر گئی، رجسٹرڈ نوجوانوں میں سب سے زیادہ تعداد طلباء اور سوشل ورکرز کی ہے جبکہ انجینئرز, اساتذہ,وکلاء اور کارپوریٹ سیکٹر سے وابسطہ افراد بھی فورس میں شامل ہے۔

کورونا ٹائیگر فورس گھروں پر کھانا مہیا کرے گی، وزیراعظم 

عثمان ڈار نے یہ بھی کہا کہ وکلاء صحافی اور ریٹائرڈ آرمڈ فورسز سے وابسطہ افراد نے بھی رجسٹریشن میں حصہ لیا اور ڈاکڑز, سیاسی ورکرز اور این جی اوز کے نوجوان بھی بڑی تعداد میں شامل ہوئے۔

معاون خصوصی عثمان ڈار  نے مزید کہا کہ پنجاب سے رجسٹرڈ نوجوانوں کی تعداد 4 لاکھ 94 ہزار سے زائد ہے جبکہ سندھ سے 1 لاکھ 11 ہزار پختون خواہ سے 1۔ لاکھ 2 ہزار نوجوان رجسٹرڈ اور اسلام آباد سے 10 ہزار بلوچستان سے 9 ہزار آزاد کشمیر سے 8 ہزار نوجوان فورس کا حصہ بن گئے۔

وزیراعظم نے ٹائیگر فورس کے اعداد و شمار سے مسلسل آگاہ رکھنے کی بھی ہدایت کرتے ہوئے کہا کہ نوجوانوں کو صوبائی اور ضلعی سطح پر جلد متحرک کیا جائے۔

 وزیراعظم عمران خان نے مزید کہا کہ نوجوانوں کا جذبہ قابل تعریف ہے, یقین تھا نوجوان مشکل وقت میں قومی جذبے کا بھرپور مظاہرہ کریں گے۔