سندھ میں کرونا وائرس ایمرجنسی ریلیف آرڈیننس کا ڈرافت بنالیا گیا ہے جس کے تحت سندھ میں رہنے والے کرایہ داروں کو رعایت دینے کے ساتھ ساتھ پانی، بجلی اور گیس کے بلز معاف کیے گئے ہیں۔

محکمہ قانون سندھ آرڈیننس کا یہ ڈرافت گورنر کو منظوری کے لیے ارسال کرے گا۔

سندھ کورونا وائرس ایمرجنسی ریلیف آرڈیننس 1 اپریل سے پورے سندھ میں لاگو ہوگا۔

آرڈیننس کے تحت کرونا وائرس سے متاثرہ طبقات کو سماجی، معاشی اور کاروباری ریلیف بھی دیا جائے گا۔

ڈرافٹ میں کرایہ داروں کےلیے بڑا پیکج رکھا گیا ہے جس کے مطابق 50 ہزار روپے سے کم کرایہ ادا نہیں کیا جائے گا جبکہ 50 ہزار سے ایک لاکھ تک کرایہ ہونے کی صورت 50 فیصد اور ایک لاکھ سے زائد کرایہ ہونے کی صورت مکمل ادا کیا جائے گا۔

تفصیلات کے مطابق ڈرافت میں ایک سے 260 یونٹ تک بجلی کا بل مکمل معاف کیا جائے گا جبکہ 261 سے 350 یونٹس تک بجلی بل میں 25 فیصد رعایت دی جائے گی۔

ڈرافت میں یہ بھی شامل کیا گیا ہے کہ 155 یونٹ تک گیس کے بل معاف کیے جائیں گے جبکہ 200 یونٹ تک گیس کے بل پر 25 فیصد معاف ہوگا، 300 یونٹس کے گیس بل پر 50 فیصد رعایت ہوگی اور 300 یونٹس سے زائد گیس کا بل ادا کرنا ہوگا۔

کورونا ایمرجنسی ریلیف آرڈیننس کی خلاف ورزی پر سزا کا اعلان بھی کیا گیا ہے۔

آرڈیننس کے تحت ریلیف نہ دینے پر موقع پر سزا ہوگی اور آرڈیننس پر عمل نہ کرنے کی صورت میں تقریباً 10 لاکھ روپے تک کا جرمانہ ہوگا۔