شمالی وزیرستان میں سکیورٹی فورسز نے کارروائی کرتے ہوئے 2 دہشتگردوں کو ہلاک کردیا جبکہ فائرنگ کے تبادلے میں پاک فوج کے ایک سپاہی شہید ہوگیا۔

پاک فوج کے شعبہ تعلقات عامہ( آئی ایس پی آر) کے مطابق شمالی وزیرستان دتہ خیل کے آٹھ کلومیٹر شمال مغرب میں دہشت گردوں کی نقل و حرکت کا پتہ چلا جس کے بعد سیکیورٹی فورسز نے فوری علاقے کو گھیرے میں لیا ۔

 ترجمان آئی ایس پی آرکا کہنا ہے کہ دہشت گردوں نے سیکیورٹی فورسز کے گھیرے میں آتے ہی فائرنگ کر دی، سیکیورٹی فورسز اور دہشت گردوں میں فائرنگ کا شدید تبادلہ ہوا جس کے باعث 2 دہشتگرد ہلاک جبکہ ایک سپاہی شہید ہوگیا۔

رنگ ونسل سے بالاترہو کر کورونا کا مقابلہ کرنا ہوگا،ڈی جی آئی ایس پی آر

 ترجمان آئی ایس پی آرکا مزید کہنا ہے کہ فائرنگ سے شہید ہونے والے سپاہی عادل شہزاد کا تعلق مانسہرہ سے ہے۔

یاد رہے اس سے قبل بھی شمالی وزیرستان میں سکیورٹی فورسز  نے کارروائی کرتے ہوئے 7 دہشتگردوں کو ہلاک کردیا جبکہ فائرنگ کے تبادلے میں پاک فوج کے 2 سپاہی شہید بھی ہوئےتھے۔

پاک فوج کے شعبہ تعلقات عامہ (آئی ایس پی آر) کے ترجمان کا کہنا تھا کہ آئی ایس پی آر کے مطابق شہداء میں سپاہی مومن شاہ اور سپاہی محمد ساجد شامل ہیں، سپاہی مومن شاہ شہید کی عمر 23 سال اور تعلق ڈی آئی خان سے ہےجبکہ سپاہی محمد ساجد شاہ شہید کی عمر 31 سال تعلق ایبٹ آباد سے ہے ۔