فیاض الحسن چوہان نے مسلم لیگ نون کے رہنما رانا ثنا اللہ کی تنقید پر جواب دیتے ہوئے کہا کہ اگر جہاز کی بنیاد پر حکومت بنتی تو شاہد خاقان عباسی کے پاس تو پوری ایئر لائن ہے۔

تفصیلا ت کے مطابق وزیراطلاعات پنجاب فیاض الحسن چوہان نے کہا ہےکہ ن لیگی رہنما بغلیں بجانے کے بجائے احتساب کے لیے تیار ہو جائیں، ان کے دور میں 30ہزار ارب کا قرضہ قوم پر مسلط کیا گیا اور اب اس قرضے پر بنائے گئے تحقیقاتی کمیشن کی رپورٹ جلد سامنے آرہی ہے۔

صوبائی وزیر نے کہا کہ قرضے پر بنائے گئے تحقیقاتی کمیشن کی رپورٹ کے منظر عام پر آنے کے بعد نون لیگی رہنما منہ چھپاتے پھریں گے۔

صوبائی وزیر اطلاعات نے کہا کہ رانا ثنا اللہ ایک بار پھر موٹی عقل والے ثابت ہوئے ہیں،حکومتیں پارٹی لیڈر کے وژن، سوچ اور جدوجہد سے بنتی ہیں، جہاز کی بنیاد پر حکومت بنتی تو شاہد خاقان عباسی کے پاس پوری ایئر لائن ہے، اس بنیاد پر ن لیگ کو دو کی بجائےتین تہائی اکثریت سے حکومت بنانی چاہیے تھی۔

انھوں نے مزید بتایا کہ آٹا چینی بحران پر فرانزک رپورٹ 25 اپریل کو عوام کے سامنے لائی جائے گی۔

واضح رہے کہ مسلم لیگ ن کے رہنما رانا ثناء اللہ نے اپنے ایک بیان میں جہانگیر ترین کا نام لیے بغیر یہ دعوی کیا تھا کہ جہاز والے کے جانے سے حکومت گر جائے گی۔