وزیر اعظم عمران خان کی جانب سے احساس ایمرجنسی کیش انفارمیشن پورٹل کے اجراء کی منظوری دے دی گئی ہے۔

تفصیلات کے مطابق معاون خصوصی ڈاکٹر ثانیہ نشتر  نے وزیرِ اعظم عمران خان کو احساس ایمرجنسی کیش انفارمشین پورٹل کی تفصیلات سے آگاہ کیا تھا جبکہ پورٹل کے قیام کا مقصد کورونا وائرس کی صورتحال میں مستحقین میں مالی معاونت کی فراہمی کے پورے عمل کو شفاف بنانا ہے اور ان اقدامات کا اصل مقصد تمام معلومات کو پبلک کرنا ہے۔

ڈاکٹر ثانیہ نشتر نے کہا ہے کہ انفارمیشن پورٹل کی بدولت کوئی بھی شخص  احساس ایمرجنسی کیش سے استفادہ کرنے والے خاندانوں کی تعداد جان سکے گا جبکہ اب تک تقسیم کی جانے والی  رقم کے بارے میں معلومات حاصل ہوسکے گی۔

انہوں نے بتایا کہ احساس ایمرجنسی کیش کی سہولت حاصل کرنے والوں میں احساس کفالت پروگرام میں درج شدہ خاندان شامل ہیں اور ایس ایم ایس کے ذریعے احساس پروگرام کا حصہ بننے والے افراد، صوبوں کی جانب سے نئے اندراج بھی شامل ہیں۔

ڈاکٹر ثانیہ نشتر کا کہنا تھا کہ وزارتِ صنعت  کی جانب سے محنت کش اور مزدور و مستحق افراد بھی شامل ہیں۔

ڈاکٹر ثانیہ نشتر کل پریس کانفرنس کے ذریعے تمام تر تفصیلات سے میڈیا کو آگاہ کریں گی جبکہ وزیرِ اعظم کی جانب سے احساس ایمرجنسی کیش پروگرام میں مکمل شفافیت کو یقینی بنانے کے حوالے سے ڈاکٹر ثانیہ اور انکی ٹیم کی کاوشوں کو بھی سراہا گیا۔