مشیر اطلاعات خیبر پختونخوا اجمل وزیر نے کہا ہے کہ لاک ڈاون میں نرمی ضرور کی گئی ہے لیکن ایس او پیز پر کسی قسم کا سمجھوتہ نہیں کیا جائیگا۔

تفصیلات کے مطابق مشیر اطلاعات خیبر پختونخوا اجمل وزیر کا پشاور کے مختلف بازاروں میں حجام اور سیلون شاپس کا دورہ کیا  اور دوسرے میں شاپس میں حکومتی گائیڈ لائنز پر عملدرآمد کا جائزہ لیا، جائزہ لینے کے بعد مشیر اطلاعات کا میڈیا بریفنگ کرتے ہوئے انہوں نے کہا کہ لاک ڈاون میں نرمی ضرور کی گئی ہے لیکن ایس او پیز پر کسی قسم کا سمجھوتہ نہیں کیا جائیگا۔

اجمل وزیر نے کہا کہ وزیراعلی محمود خان کے واضح احکامات ہیں کہ ایس او پیز پر عمل درآمد نہ کرنے کی صورت میں دوبارہ لاک ڈاون کیا جائیگا لیکن ایس او پیز پر عمل درآمد کی صورت میں لاک ڈاون میں مزید نرمی بھی کی جاسکتی ہے۔

انہوں نے کہا کہ آج میں وزیر اعلی محمود خان کی خصوصی ہدایت پر حجام اور سیلون شاپس کا دورہ کررہا ہوں اور ایس او پیر پر عمل درآمد کا جائزہ لے رہا ہوں جبکہ یاد رہے کہ حجام اور سیلون شاپس کو حکومت نے ایس او پیز کے تحت ہفتے میں تین دن جمعہ ہفتہ اور اتوار کو کھولنے کی اجازت دی گئی ہے۔

ان کا کہنا تھا کہ پیر سے جمعہ تک دیگر دکانوں اور بازاروں کو ایس او پیز کے تحت کھولنے کی اجازت دی گئی ہے اور  مختلف دنوں میں مختلف کاروبار کھولنے کا مقصد بیک وقت بازاروں میں رش اور جم غفیر سے بچنا ہے۔

اجمل وزیر نے بتایا کہ لاک ڈاون میں نرمی بھی غریب اور دیہاڑی دار طبقے کی مشکلات کو مدنظر رکھ کر کی گئی ہے لیکن  عوام اور تاجر برادری سے اپیل ہے کہ جس طرح انہوں نے لاک ڈاون میں حکومت کا ساتھ دیا ہے اسی طرح ایس او پیز پر عمل درآمد میں بھی حکومت کا ساتھ دیں۔

اجمل وزیر نے بتایا کہ پیپلز پارٹی اور ن لیگ کی قیادت کو میں یہاں سے بتانا چاہتا ہوں کہ آپ ٹھنڈے ڈرائنگ روم سے باہر نکل کر ہماری طرح بازاروں کا دورہ کریں تو پتہ چلے گا کہ مکمل لاک ڈاون کیا چیز ہے اور اسکے نقصانات کیا ہیں۔